Jak raskruciłasia samaja papularnaja šaurmičnaja ŭ Minsku
Paśla źmieny niekalkich padradčykaŭ na pr. Niezaležnaści niedaloka ad HUMa adkryłasia piataja šaurmičnaja Döner King — mabyć, adnaho z samych jarkich prajektaŭ apošniaha času na nacyjanalnym rynku hramadskaha charčavańnia.
Prajekt, jaki ledź nie «pachavaŭ» kiraŭnik rasijskaha Raśsielhasnahladu Siarhiej Dankviert, płanuje raźvivacca i da kanca hoda adkryć siem novych punktaŭ.
Pra toje, jak pačynaŭsia i jak raźvivajecca hety biznes, u listapadzie ŭ ramkach adukacyjnaha sieminara «Biznes u styli FLEX» raspavioŭ adzin z top-mieniedžaraŭ Döner King Uładzisłaŭ Mitrafanaŭ, pieradaje ej.by.
Niekalki hadoŭ tamu prabaćka Döner King — heta była kruhłasutačnaja šaurmičnaja na vulicy Prytyckaha, jakaja źjaŭlałasia dadatkam da asnoŭnaha biznesu jaje ŭładalnika, handlu miasam i miasnymi praduktami «Hieorhij i syny». Paŭtara hoda tamu było pryniata rašeńnie ab raźvićci sietki ŭstanoŭ hramadskaha charčavańnia. Pačalisia pieramovy z bankami, ale praktyčna adrazu prajekt sutyknuŭsia z fors-mažoram. U śniežni 2016 hoda kiraŭnik Raśsielhasnahladu Siarhiej Dankviert zrabiŭ zajavu, što znajšoŭ kanał «niezakonnych pastavak» ukrainskaj jałavičyny praź Biełaruś i što hetym dakładna zajmajecca biełaruskaja kampanija «Hieorhij i syny», jakaja mahła zarabić da 100 młn dalaraŭ. Jašče raniej była ŭviedziena zabarona na pastaŭku hetaj kampanijaj pradukcyi ŭ Rasiju. Na hetym fonie mnohija banki paśpiašalisia adchryścicca ad uładalnika hetaj kampanii i jaho prajekta šaurmičnych. Niekatory čas biznes bałansavaŭ na miažy bankructva, ale ŭ vyniku ŭładalniku i mieniedžmientu ŭdałosia znajści krynicu kredytu ŭ 1 młn dalaraŭ, jaki ŭkładzieny ŭ raźvićcio Döner King.
Nieŭzabavie było nabyta miesca ŭ handlovym centry «Hłoba», a ŭletku hetaha hoda ŭstanova sietki źjaviłasia na prestyžnaj mienskaj vulicy Zybickaja. Jašče adzin punkt pracuje na vuł. Ja. Kołasa ŭ handlovym centry «Ajśbierh».
«Pracujučy na Prytyckaha, my pačali razumieć pracesy, košt, efiekt abjomu… I padumali: pasprabujem stvaryć mas-pradukt. A raptam atrymajecca? Vyrašyli, što adkryjem niekalki punktaŭ, bo na efiekcie masy, pradstaŭlenaści sietki pavinny raści prodažy. Kali nie — sychodzim, — raspavioŭ Uładzisłaŭ Mitrafanaŭ, jak pačynaŭsia hety prajekt. — My pakinuli canu 5 rubloŭ (za maleńkuju śvinuju šaurmu), na dadzieny momant heta na 20—30% nižej za rynak. I čakali: pojdzie — nie pojdzie. I voś u nas adkryŭsia punkt na Umanskaj — vyniki pieraŭzyšli čakańni ŭ try razy. Na nastupny miesiac vyručka ŭ paŭtara raza vyrasła i na Prytyckaha. A kali my adkrylisia na Zybickaj — heta było traplańnie «ŭ dziasiatačku». Prodažy ŭ pieršym punkcie vyraśli jašče ŭ paŭtara raza. Paznavalnaść stała maštabnaj».