Łukašenka: My adkryvajem novuju staronku adnosinaŭ z Hiermanijaj
Biełaruś adkryvaje novuju staronku adnosin z Hiermanijaj, nakiravanuju ŭ lepšy bok. Pra heta zajaviŭ Alaksandr Łukašenka 17 listapada na sustrečy ź vice-kancleram, fiederalnym ministram zamiežnych spraŭ Zihmaram Habryelem, paviedamlaje BiełTA.
«Šmat havorać pra minułaje našych adnosin, niehatyŭnyja fakty i faktary. Ale ŭ Minsku jość šmat taho, što ŭ stanoŭčym płanie charaktaryzuje našy dziaržavy», — padkreśliŭ Alaksandr Łukašenka. «Čas idzie, jon mianiaje mnohaje. Tak i ŭ sučasnym śviecie našy adnosiny źmianiajucca ź ciaham času, — zaŭvažyŭ jon. — Ja vielmi spadziajusia i ŭpeŭnieny, što my adkryvajem novuju staronku ŭ našych adnosinach, nakiravanuju ŭ lepšy bok».
Kiraŭnik dziaržavy vykazaŭ słovy ŭdziačnaści hiermanskamu boku za štohadovuju dapamohu ŭ azdaraŭleńni biełaruskich dziaciej z paciarpiełych ad avaryi na ČAES terytoryj.
Akramia taho, jon vykazaŭ udziačnaść za technałahičnuju padtrymku, što akazvajecca biełaruskaj ekanomicy. «Amal uvieś impart z Hiermanii - heta vysokatechnałahičnaje abstalavańnie, technałohii», - zaŭvažyŭ Alaksandr Łukašenka. «My b vielmi chacieli, kab hety pazityŭny praces mieŭ svoj dalejšy praciah na bolš vysokim ekanamičnym uzroŭni», - padkreśliŭ Prezident, prapanavaŭšy niamieckamu boku źviarnuć uvahu na industryjalny park «Vialiki kamień», dzie stvorany samyja lhotnyja ŭmovy dla inviestaraŭ. Prajekt realizavany z ulikam suśvietnaha dośviedu stvareńnia padobnych parkaŭ.
Biełaruski lidar zapeŭniŭ: «Kali my damovimsia i paabiacajem vam niešta zrabić, my abaviazkova zrobim».
Alaksandr Łukašenka taksama paprasiŭ hiermanskamu boku ŭvažliva sačyć za situacyjaj u Biełarusi i abjektyŭna jaje aceńvać: «Kali heta tak budzie, to ŭ nas usio atrymajecca. Z terytoryi Biełarusi vy nikoli nie atrymajecie ni adnaho sihnału ŭ parušeńnie cełasnaści i biaśpieki jeŭrapiejskaha kantynienta».