Rasiejec prydumaŭ chitruju schiemu, kab adabrać u minskaha kurjera fotaaparat za $3000
Minskaja milicyja zatrymała 40-hadovaha hramadzianina Rasii, jaki abrabavaŭ kurjera internet-kramy.
Mužčyna pryjechaŭ u Miensk 9 listapada — jak jon raspavioŭ milicyjantam, płanavaŭ sustrecca ź siabroŭkaj. Ale sustreča admianiłasia, a jon vyrašyŭ zastacca na niekatory čas i źniaŭ žyllo na sutki.
Kab nidzie nie pakinuć svajho imieni, hość pa roznych pryčynach admaŭlaŭsia davać pašpart dla zaklučeńnia damovy haspadyni kvatery, adnak za žyllo płaciŭ.
U niejki momant mužčyna vyrašyŭ «zdabyć» sabie dobry fotaaparat. Dla hetaha jon raspracavaŭ cełuju schiemu.
Mužčyna zamoviŭ fotaaparat. Kali praź niekatory čas pryjechaŭ kurjer, patelefanavaŭ mužčynu, toj skazaŭ, što padychodzić da doma. Sustreča adbyłasia ŭ mašynie. Rasiejec, uvažliva vyvučyŭšy fotaaparat, zaprasiŭ kurjera dadomu.
Kali ž jany padyšli da kvatery, rasiejec adkryŭ dźviery, prapuściŭ kurjera pieršym i, jak tolki toj apynuŭsia ŭ piarednim pakoi, začyniŭ zvonku dźviery. Fotaaparat zastaŭsia u złamyśnika. Kab achviara nie zmahła paklikać na dapamohu praz vokny, rasiejec zahadzia źniaŭ ź ich ručki.
A pad leśvicaj ŭ padjeździe schavaŭ pras, jaki napiaredadni skraŭ z kvatery.
«Da złačynstva jon padrychtavaŭsia staranna, pradumaŭ usio da detalaŭ, navat kupiŭ žanočuju kurtku, kapialušyk i čaraviki 36-ha pamieru. Jany stvarali efiekt prysutnaści žančyn u kvatery, što było jamu na ruku. Dziakujučy hetamu adzin raz jamu ŭdałosia nie puścić u dom haspadyniu: spasłaŭsia, što ŭ pakoi śpić žančyna. A kurjer, ubačyŭšy žanočyja rečy, ničoha nie zapadozryŭ», — raspavioŭ namieśnik načalnika ŭpraŭleńnia kryminalnaha vyšuku HUUS Mikałaj Šybałka.
Praŭda, praz vosiem hadzin paśla ździajśnieńnia złačynstva rasiejca zatrymali. Vyśvietliłasia, što za hety čas jon paśpieŭ źniać numar u chostele. Pry im na momant zatrymańnia byli fotaaparat i pras. U milicyi jon raspavioŭ, što na złačynstva jaho šturchnuła kryŭda, jakuju jon niekali zataiŭ na rasijskuju internet-kramu. Takim čynam prosta vyrašyŭ adpomścić.
Ciapier mužčynu moža pahražać da 8 hadoŭ pazbaŭleńnia voli, pa fakcie rabavańnia raspačata kryminalnaja sprava.