Sud nad rehnumaŭcami ŭ Minsku budzie adkrytym
Sudovy praces suprać troch aryštavanych amal hod tamu aŭtaraŭ rasijskaha ahienctva «Regnum» pačniecca ŭ Minsku roŭna praź miesiac — 18 śniežnia ŭ Haradskim sudzie, paviedamlaje pamočnica staršyni Minharsuda Nastaśsia Šylvian.
Dźmitryja Alimkina abvinavačvajuć u ździajśnieńni złačynstva, praduhledžanaha č. 3 art.130 KK — raspalvańni mižnacyjanalnaj varožaści.
Dvuch inšych aŭtaraŭ — Juryja Paŭłaŭca i Siarhieja Šypcienku - u ździajśnieńni złačynstvaŭ, praduhledžanych č.1 st.233 i č.3 art.130 KK. — niezakonnaj pradprymalnickaj dziejnaści.
Aŭtary, jakija pisali dla ahienctva «Regnum», byli zatrymanyja ŭ Minsku na pačatku śniežnia minułaha hoda — i praviali pad vartaj bolš za 11 miesiacaŭ da pryznačeńnia daty suda.
Juryj Paŭłaviec — dacent Biełaruskaha dziaržaŭnaha univiersiteta infarmatyki i radyjoelektroniki. Da aryštu vykładaŭ palitałohiju i ideałohiju biełaruskaj dziaržavy. Dźmitryj Alimkin — školny vartaŭnik z Bresta. Siarhiej Šypcienka da 2010 hoda pracavaŭ u Akademii kiravańnia pry prezidencie Biełarusi, ale byŭ zvolnieny za supracoŭnictva z sajtami «Impieryja» i «Regnum». Jaho zatrymali na dzień paźniej za Paŭłaŭca i Alimkina.
Na svajoj staroncy ŭ fejsbuku jon u toj dzień paśpieŭ prakamientavać dva papiarednija aryšty: «Pa «vietlivym ludziam» zasumavali».
Na pytańnie, zadadzienaje pres-sakratarcy rasijskaha MZS Maryi Zacharavaj ŭ kancy śniežnia minułaha hoda pra zatrymańni ŭ Minsku, jana adkazała:
«Chaču skazać, što «niedanarod» i «niedadziaržava» z vusnaŭ ludziej, jakija ŭpłyvajuć na hramadskuju dumku — heta prosta niepatrebnyja rečy, tamu što jany mohuć spryjać raspalvańniu mižnacyjanalnaj prablemy i ksienafobii», — skazała tady Zacharava.
Asnoŭnyja pasyły tekstaŭ aryštantaŭ: Biełaruś — niedadziaržava, biełaruskaja mova — dyjalekt ruskaj, a Biełaruś, Rasija i Ukraina — «adzin narod».
Kryminalnaja sprava była zaviedzienaja paśla taho, jak Ministerstva infarmacyi Biełarusi źviarnułasia ŭ Śledčy kamitet i nakiravała tudy teksty Paŭłaŭca, Alimkina i Šypcienki dla praviadzieńnia ekśpiertyzy na pradmiet raspalvańnia mižnacyjanalnaj varožaści.