Biełaruś uvajšła ŭ dziasiatku krain z samym tannym internetam
Niezaležnaja kansałtynhavaja kampanija BDRC Continental praviała daśledavańnie koštaŭ pasłuh internet-pravajderaŭ 196 krain śvietu. Vyjaviłasia, što samy tanny internet — u krainach SND, a samy darahi — u afrykanskich.
Daśledčyki pieraviali ŭ dalary košt 3351 taryfa ad roznych pastaŭščykoŭ internetu, u tym liku 24 pakieta pasłuh u Biełarusi. Vyjaviłasia, što siaredni košt šyrokapałosnaha internetu ŭ našaj krainie — 12,77 dalaraŭ, što stavić Biełaruś na siomaje miesca ŭ śpisie.
Na pieršym miescy apynuŭsia Iran, dzie siaredni košt interneta składaje 5,37 dalaraŭ u miesiac. Samy ž darahi košt vychadu ŭ hłabalnuju sietku — u Burkina-Faso, dzie za heta treba zapłacić niejmaviernyja nie tolki pa afrykanskich, ale i pa biełaruskich mierkach 954,54 dalaraŭ.
A voś, na jakich miescach raźmiaścilisia našyja susiedzi (siaredni košt pakieta pasłuh na miesiac):
2. Ukraina — $5.47
3. Rasija — $10.10
12. Polšča — $19.40
16. Łatvija — $19.87
121. Litva — $70.53