Fielčar prysaromiŭ chulihana, jaki sikaŭ na aŭto. A toj sabraŭ siabroŭ i kinuŭsia z nažom
U Rečycy zvyčajnaja zaŭvaha susiedu pa domie skončyłasia tym, što ŭ dačynieńni da adnaho raspačata kryminalnaja sprava, a druhi mužčyna znachodzicca ŭ balnicy.
Uviečary fielčar rečyckaj rajonnaj balnicy paśla pracy viartaŭsia dadomu. Užo padychodziačy da piacipaviarchovika na vulicy Ivanaŭskaj ubačyŭ maładoha chłopca, jaki nie saromiejučysia spraŭlaŭ małuju patrebu na adzin z pryparkavanych u dvary aŭtamabilaŭ. 34-hadovy mužčyna zrabiŭ zaŭvahu i pačaŭ saromić taho. Ale pjanamu chłopcu heta nie spadabałasia, i jon kinuŭsia na miedrabotnika z kułakami. Toj ahresiŭny vypad adbiŭ, ale paabiacaŭ, što prosta tak heta nie pakinie.
I sapraŭdy, miedyk vyrašyŭ pahladzieć videazapisy z kamier videanazirańnia, ustalavanych na domie. Tym časam pjany chulihan-sikun sabraŭ dvuch bratoŭ i znajomaha dy zasieŭ u zasadu.
Adhledzieŭšy videa bojki fielčar i žančyna, staršynia kamiteta zabudoŭščykaŭ, vyjšli na vulicu. Usio astatniaje adbyłosia vokamhnienna. Chulihany ŭziali mužčynu ŭ ščylnaje koła. Žančyna paśpieła nabrać «102» i paviedamić ab zdareńni ŭ milicyju.
Ale ŭ niejki momant fielčar, jaki sprabavaŭ dać adpor ŭsioj čaćviorcy, hučna ŭskryknuŭ i asunuŭsia, a ŭsia čaćviorka kinułasia chto kudy. Padbiehšy da mužčyny žančyna zrazumieła, što treba vyklikać i chutkuju dapamohu. U taho akazałasia nažavoje ranieńnie žyvata…
Fielčaru, jaki atrymaŭ dva nažavyja ranieńni, u chirurhičnym adździaleńni apieratyŭna akazali nieabchodnuju dapamohu.
Milicyja adrazu znajšła pjanaha chulihana. Jamu pahražaje da vaśmi hadoŭ pazbaŭleńnia voli.