Vystaŭlenaje abvinavačvańnie Andreju Bialaŭskamu sa «spravy patryjotaŭ», jaki zachoŭvaŭ patron
Andreju Bialaŭskamu, suprać jakoha była zaviedziena kryminalnaja sprava za zachoŭvańnie patrona, pradjaŭlenaje aficyjnaje abvinavačvańnie pa č.2 art. 295 KK RB (Niezakonnyja vyrab, nabyćcio, pieradača ŭ vałodańnie, zbyt, zachoŭvańnie, pieravozka, pierasyłka abo našeńnie ahniastrelnaj zbroi, bojeprypasaŭ, vybuchovych rečyvaŭ i h.d.). Pra heta Bialaŭski paviedamiŭ siabram 12 śniežnia, paśla čarhovaha dopytu ŭ Śledčym kamitecie, piša spring96.org.
Mahčymaje pakarańnie pa hetym artykule — papraŭčyja raboty na termin da dvuch hadoŭ, abo aryšt na termin da troch miesiacaŭ, ci abmiežavańnie voli na termin da piaci hadoŭ, abo pazbaŭleńnie voli na termin da siami hadoŭ z kanfiskacyjaj majomaści abo biez kanfiskacyi.
Takim čynam patron, jaki lažaŭ u šafie ŭ jakaści suvienira, moža stać pryčynaj doŭhaterminovaha źniavoleńnia dla byłoha fihuranta spravy ab padrychtoŭcy masavych biesparadkaŭ.
A. Bialaŭski padčas dopytu pieradaŭ śledčamu, jaki viadzie spravu, chadajnictva ab spynieńni kryminalnaha pieraśledu, z prośbaj pryznać jaho ŭčynak z zachoŭvańniem patrona nie ŭjaŭlajučym hramadskaj niebiaśpieki i jurydyčna niaznačnym.
Uličvajučy hetyja jurydyčnyja akaličnaści i mahčymyja nastupstvy, pravaabaronca Valancin Stefanovič, kamientujučy zaviadzieńnie kryminalnaj spravy suprać Andreja Bialaŭskaha, zaklikaŭ Śledčy kamitet być paśladoŭnymi i prajavić pravavuju łohiku.
«Pakolki Śledčy kamitet, jaki spyniŭ kryminalny pieraśled fihurantaŭ spravy, u chodzie papiaredniaha rasśledvańnia ŭstanaviŭ, što «analizujučy ŭ sukupnaści sabranyja dokazy, śledstva pryjšło da vysnovy, što dziejańni fihurantaŭ spravy tak zvanaha «Biełaha lehijona» farmalna ŭtrymlivajuć prykmiety stvareńnia niezakonnaha ŭzbrojenaha farmiravańnia, ale hetyja dziejańni abvinavačanych nie byli nakiravanyja na hvałtoŭnaje źmianieńnie kanstytucyjnaha ładu ci terytaryjalnaj cełasnaści dziaržavy, a taksama na ździajśnieńnie jakich-niebudź inšych supraćpraŭnych dziejańniaŭ», jany nie ŭjaŭlajuć hramadskaj niebiaśpieki, ułaścivaj złačynstvu, pakolki nie pryčynili istotnuju škodu achoŭvajemym zakonam intaresam i hramadskim adnosinam», to dziejańni abvinavačanych, z ulikam vykładzienaha, u adpaviednaści z č. 4 art. 11 KK pryznanyja niaznačnymi».
Mastak-dyzajnier ź Minska Andrej Bialaŭski byŭ zatrymany 21 sakavika i abvinavačany pa častcy 3 artykuła 293 Kryminalnaha kodeksu «Navučańnie i padrychtoŭka da ŭdziełu ŭ masavych biesparadkach» i art. 287 Kryminalnaha kodeksa (Stvareńnie niezakonnaha ŭzbrojenaha farmiravańnia). Adpuščany ź SIZA KDB pad padpisku ab niavyjeździe 2 červienia sa spynieńniem spravy pa art.287 KK.