Łajfńjuz: ZŠA chočuć stvaryć u Biełarusi pieradavyja vajskovyja bazy zabieśpiačeńnia
Novaja siensacyja ad rasijskich «analitykaŭ» — prakramloŭski tabłoid pužaje čytačoŭ pierśpiektyvaj raźmiaščeńnia amierykanskich sałdat na terytoryi Biełarusi.
Asnoŭnaja ideja artykuła — hradus supiernictva pamiž Rasijaj i Zachadam raście, heta vymušaje amierykancaŭ uzmacniać cisk u vajskovaj śfiery.
«Antyrasijskija infarmacyjnyja kampanii naceleny na stvareńnie piermanientnaj rusafobskaj isteryi i apraŭdańnie ŭłasnaj vajennaj padrychtoŭki na miežach va Uschodniaj Jeŭropie. Amierykanskija Uzbrojenyja siły, miarkujučy pa ŭsim, rychtujucca da pašyreńnia svajoj prysutnaści na rasiejskich miežach, pryčym akramia tradycyjnych amierykanskich partnioraŭ i sajuźnikaŭ u rehijonie amierykanskija vajskoŭcy žadajuć praanalizavać mahčymaści stvareńnia pieradavych apieratyŭnych baz u tym liku i ŭ Biełarusi», — piša «Łajf» (były «Łajfńjuz»).
Takija vysnovy aŭtary robiać paśla publikacyi tendaraŭ Minabarony ZŠA. Amierykancy źbirajucca vyvučyć krainy Uschodniaj Jeŭropy «dla transpartnych i materyjalna-techničnych patrebaŭ svaich Uzbrojenych siłaŭ». U śpis krainaŭ dla vyvučeńnia trapili Małdova, Ukraina, Polšča, Finlandyja — i Biełaruś.
«Unutrypalityčnyja pracesy ŭ Biełarusi dajuć niejkija padstavy analitykam Pientahona mroić ab svaich pieradavych bazach na terytoryi krainy. Raście ekanamičnaje adasableńnie, staŭka ź niadaŭniaha času na pavolnuju napampoŭku nacyjanalistyčnych nastrojaŭ, žadańnie aficyjnaha Minska, bałansujučy pamiž Maskvoj i Bruselem, zajmać «niezaležnuju» zamiežnapalityčnuju pazicyju, u tym liku i pa pytańniach Kryma i kanfliktu na paŭdniovym uschodzie Ukrainy, — usio heta, vidavočna, daje padstavy budavać płany pa vykarystańni ŭ budučyni terytoryi krainy dla razhortvańnia zamiežnaj vajennaj infrastruktury, padrychtoŭku da čaho my i bačym u daśledčym tendary Pientahona», — robić vysnovy «Łajf».