Fejsbuk mianiaje ałharytmy: jak heta paŭpłyvaje na kožnaha?
Najbujniejšuju ŭ śviecie sacyjalnuju sietku Fejsbuk čakajuć vialikija pieramieny. Kiraŭnik internet-hihanta na svajoj staroncy zajaviŭ, što kampanija źmienić pryncypy vydačy infarmacyi ŭ stužku navin. Užo ŭ chutkim časie kožny karystalnik sacyjalnaj sietki budzie bačyć mienš publičnaha kantentu (ad kampanij, brendaŭ i miedyja), i bolš asabistaha kantentu ad siabroŭ. U niekalkich halinach hetaja navina vyklikała sapraŭdnuju paniku: stratehii ŭ sacyjalnych sietkach, napracavanyja za apošnija hady, stanoviacca absalutna nieprydatnymi. Ale hetaja navina paŭpłyvaje na kožnaha internet-karystalnika, navat kali Fejsbukam vy nie karystajeciesia całkam.
U apošnija niekalki hadoŭ Fejsbuk zachapili prafiesijanały. Stužka navin amal kožnaha karystalnika zaraz składajecca amal z adnych paviedamleńniaŭ ad brendaŭ i ŚMI. U toj čas kantent siabroŭ (a heta toje, dziela čaho Fejsbuk i stvaraŭsia) staŭ amal niezaŭvažnym.
Fejsbuk choča viarnucca da svajoj hałoŭnaj misii — źviazvać siemji i siabroŭ, tamu paviedamleńni vašych siabroŭ znoŭ pačnuć pieravažać u stužcy nad paviedamleńniami brendaŭ i miedyja.
Navošta Cukierbierh heta robić?
Kiraŭnik Fejsbuku piša, što sacsietka stvarałasia dla ludziej, ale ŭ vyniku jaje zachapili struktury. Sistema akazałasia nastolki dobraj, što ŭ jaje pierajšoŭ kožny, chto zacikaŭleny ŭ raspaŭsiudžvańni svajoj infarmacyi, abychodziačy ŚMI, u tym liku sami ŚMI. Karystalniki Fejsbuku pieratvarylisia z subjektaŭ u abjekty sacyjalnaj sietki.
Cukierbierh śćviardžaje, što zhodna z daśledavańniami Fejsbuku, sacyjalnyja sietki majuć dobry ŭpłyŭ na ludziej tolki tady, kali jany vykarystoŭvajuć ich dla kamunikacyi sa svaimi rodnymi i siabrami, a voś «pasiŭnaje» vykarystańnie sacsietak zhodna z hetym samym daśledavańniem źjaŭlajecca škodnym.
Jašče adnoj pryčynaj źjaŭlajecca imknieńnie Cukierbierha paźbiehnuć upłyvu ałharytmu Fejsbuku na hramadskija pracesy i navat vybary. Uraźlivaść sistemy robić mahčymym źniešni ŭpłyŭ na hramadskaje mierkavańnie, palaryzacyju hramadstva i raspaŭsiudžvańnie nianaviści. Naŭrad ci Cukierbierh chacieŭ, kab sprava ŭsiaho jaho žyćcia vykarystoŭvałasia takim čynam.
Jakija buduć nastupstvy?
Dla brendaŭ i ŚMI, jakija abapiralisia na sacyjalnyja sietki, nastupstvy mohuć być katastrafičnymi. Nie sakret, što niekatoryja ź ich navat pierastali aryjentavacca na svaje sajty i amal całkam pierajšli ŭ sacyjalnyja sietki.
Akramia taho, va ŭsim śviecie Fejsbukam aktyŭna karystajucca roznyja niekamiercyjnyja arhanizacyi, hramadskija abjadnańni i hrupy pa intaresach. Imavierna, što jany taksama stanuć achviarami novych ałharytmaŭ, bo ich paviedamleńni taksama buduć pakazvacca ŭ stužcy ŭ mienšaj kolkaści. Ale samaje cikavaje, jak padobnyja źmieny paŭpłyvajuć na aŭdytoryju krain byłoha SSSR, bo ŭ krainach našaha rehijonu jość svaje admietnaści.
A što ŭ nas?
Aŭdytoryja Fejsbuku ŭ krainach Zachodniaj Jeŭropy i ZŠA adroźnivajecca ad aŭdytoryi krain byłoha SSSR. U ZŠA Fejsbuk maje prykładna takuju ž pa charaktarystykach aŭdytoryju, jak «Vkontaktie» i «Adnakłaśniki» ŭ Rasii. A voś u krainach našaha rehijona Fejsbuk ličycca elitarnaj sacsietkaj, u jakoj siadziać pieravažna žychary bujnych haradoŭ, i sama aŭdytoryja bolš sfakusavanaja na abmierkavańni palityčnych i dziełavych tem (u Jeŭropie i Amierycy takuju funkcyju vykonvaje LinkedIn). Tamu možna čakać, što biełaruskija karystalniki Fejsbuku pazbaviacca mahčymaści dasyłać i atrymlivać dziełavyja i palityčnyja naviny ŭ raniejšych abjomach. Dzieci, kociki i smačnaja ježa vycisnuć z sacyjalnaj sietki jaje «elitarny» kampanient. A ciapierašnija karystalniki Fejsbuku mohuć prosta syści ŭ mesandžary (Telegram, Viber, WhatsApp i Messenger).
Z-za taho, što karystalniki sacyjalnych sietak buduć bačyć mienš navin, źmienšycca i kolkaść ich abmierkavańniaŭ. Jość vierahodnaść taho, što ŭ krainach byłoha SSSR znoŭ adrodziacca tematyčnyja forumy, jakija ŭ svoj čas byli vycisnutyja sacsietkami.
Ja chaču i dalej čytać «Našu Nivu» ŭ Fejsbuku! Što mnie rabić?
Kali zamiest rekłamy, kocikaŭ i novych kvietak svajoj stryječnaj ciotki vy chočacie i nadalej atrymoŭvać usiu samuju apošniuju i hruntoŭnuju infarmacyju ad «Našaj Nivy», vy možacie zrabić niekalki vielmi prostych dziejańniaŭ.
Uviersie našaj staronki na FB šukajecie knopku «Vy padpisanyja» («Podpiski»), navodzicie na jaje kursoram, a potym u punkcie «U vašaj stužcy navin» («V vašiej lentie novostiej») zamiest punktu «Pa zmaŭčańni» («Po umołčaniju») vy vybirajecie punkt «Bačyć najpierš» («Prioritiet v pokazie»).
A kali Fejsbuk vy nie vielmi šanujecie, padpisvajciesia na našyja kanały ŭ Telehramie i Vajbiery.