Uvodzicca superliberalny padachodny padatak
Jon budzie adnolkavy dla ŭsich katehoryj nasielnictva i składzie 12% ad zarobku. Ciapier u Biełarusi isnuje dyferencyjavany padatak, minimalny pamier jakoha składaje 9%, a maksymalny 30%. Novaŭviadzieńnie spryjaje bahatym i čaplaje ludziej ź siarednimi i nizkimi dachodami.
Siońnia deputaty pałaty pradstaŭnikoŭ pryniali ŭ pieršym čytańni zakonaprajekt pra adzinuju staŭku padachodnaha padatku.
U Biełarusi ŭ 2009 hodzie źbirajucca ŭvieści tak zvanuju płoskuju škału padatku. Inicyjatyva sychodzić ad kiraŭnika krainy Alaksandra Łukašenki.
Heta aznačaje, što padachodny padatak budzie adnolkavy dla ŭsich katehoryj nasielnictva i składzie 12 % ad zarobku. Ciapier ža ŭ Biełarusi isnuje dyferencyjavany padatak, minimalny pamier jakoha składaje 9 %, a maksymalny 30 %.
Ministar finansaŭ Biełarusi Andrej Charkaviec, jaki pradstaviŭ prajekt zakona deputatam skazaŭ, što taksama miarkujecca ŭvieści adziny pamier padatku i dla pradprymalnikaŭ. Jon budzie składać 15 %. Pavodle spadara Charkaŭca, sioleta pradprymalniki płaciać u siarednim 16,3 % ad svajho zarobku.
Novaŭviadzieńnie spryjaje bahatym i čaplaje ludziej ź siarednimi i nizkimi dachodami. Ludzi z vyšejšymi dachodami ci tyja, chto atrymlivaje dachody ź niekalkich krynicaŭ, stanuć płacić mienš. Uradavyja ekanamisty spadziajucca, što dziakujučy hetamu bolš ludziej stanie deklaravać svaje dachody. Taksama heta zrobić Biełaruś vyhadnym miescam žyćcia dla bahatych ludziej.
U toj ža čas asoby, čyje dachody nie pieravyšajuć siaredniaha zarobku, chto žyvie z adnoj zarpłaty, stanuć płacić krychu bolš.
Pryniaćcie novaha zakonu vyvodzić Biełaruś u šerah samych prarynkavych krainaŭ pa systemie padachodnaha padatku.