Minčanka: Ja ledź nie straciła dzicia praz pracadaŭcu. A ciapier jon idzie ŭ deputaty i abiacaje abaraniać pravy rabotnic!
U Redakcyju źviarnułasia minčanka Ina Sinkievič, jakaja vyrašyła apubličyć historyju, što adbyłasia ŭ 2015 hodzie. Padšturchnuła jaje da hetaha znajomaje proźvišča ŭ śpisie kandydataŭ u Minharsaviet: Viačasłaŭ Kuźniacoŭ, namieśnik dyrektara Minskaha miechaničnaha zavoda pa režymie, kadrach i ideałahičnaj pracy. Vyłučajecca jon ad Partyi pracy i spraviadlivaści.
«Ja pracavała na miechaničnym zavodzie buchhałtarkaj. U 2015 hodzie zaciažaryła i pačała rabić abśledavańni. Adno ź ich pakazała, što ŭ mianie pahroza stracić dzicia vyšej za siaredniestatystyčnuju. Ja źviartałasia da roznych daktaroŭ z vynikami hetaha abśledavańnia, i mnie raili pieravieścisia na skaročany pracoŭny dzień, — raspaviadaje Ina. — Tak, buchhałtar — davoli lohkaja kabinietnaja prafiesija, ale kab usio było dobra ź dziciom, varta było pieravieścisia».
Pracedura pieravodu nie vielmi składanaja, ale nieabchodnyja papierki musiać być, bieź ich skaročany dzień nichto nie pryznačyć. Inie treba było prynieści ŭ žanočuju kansultacyju ci vypisku z atestacyi pracoŭnych miescaŭ, ci vytvorčuju charaktarystyku pracoŭnaha miesca.
«Spačatku ja źviarnułasia ŭ adździeł achovy pracy z prośbaj zrabić mnie vypisku. Bolš za miesiac mnie nie adkazvali, tamu ja nakiravała zakazny list da načalnika adździeła kadraŭ. Potym mianie paklikali ŭ adździeł achovy pracy i skazali, što hetaja atestacyja nie rabiłasia, što na pradpryjemstvie žančyny nikoli nie prasilisia na skaročany pracoŭny dzień, što niama padstaŭ mianie pieravodzić i što mnie heta ŭvohule nie treba. Karaciej, admovili. Ja asabliva nie aburałasia, bo viedała, što moj list užo musić być u adździele kadraŭ», — praciahvaje Ina.
Ale adkazu z adździeła kadraŭ jana tak i nie dačakałasia, bo patrapiła ŭ špital.
«Heta byŭ piaty miesiac ciažarnaści. Na hetym terminie dziela zachavańnia ciažarnaści robiać apieracyju: zašyvajuć šyjku matki. Ja pahadziłasia, bo heta ličycca paśpiachovaj mieraj, dziakujučy jakoj ciažarnaść zachoŭvajecca ŭ 70% vypadkaŭ. Kali ja pračnułasia paśla narkozu, mnie skazali, što spravy kiepskija: kali da kanca tydnia zachavajecca ciažarnaść, to ŭ mianie budzie dzicia, a kali nie, to nie», — pryhadvaje Ina.
Praz tydzień joj udałosia zachavać ciažarnaść, adnak pačali adychodzić vody. Žančyna cudam paźbiehła abortu i nastupnyja dva miesiacy pralažała ŭ špitali. Na siomym miesiacy ciažarnaści jana naradziła dzicia.
«Kali vyjšła sa špitala, ja nakiravała zvarot u Departamient dziaržaŭnaj inśpiekcyi pracy. U adkazie adznačałasia, što pracadaŭca parušyŭ 51 artykuł Pracoŭnaha kodeksa [nieabchodnyja rabotniku dakumienty jon musiŭ vydać ciaham piaci dzion — Red.]. Z hetaj papieraj ja źviarnułasia da pracadaŭcy z zajavaj ab zvalnieńni, ale ŭ joj nie ŭkazała pryčynu, tamu mianie zvolnili biez vychadnoj dapamohi, — tłumačyć Ina. — Ja sudziłasia praz heta, ale pracadaŭca admaŭlaŭ parušeńnie. Ź vielmi vialikaj ciažkaściu ŭdałosia dakazać, što 9+5 nie raŭniajecca 26. Heta daty miesiaca, u jakija ja viała karespandencyju. Sam hety fakt ja dakazała, ale jon mnie ničoha nie daŭ, hrošy ja nie viarnuła».
Ciapier Ina rychtujecca da jašče adnaho suda pa hetaj spravie, bo ŭ jaje źjavilisia novyja materyjały, jakija, mahčyma, zmohuć paŭpłyvać na rašeńnie suda.
Ale bolš za ŭsio ŭ hetaj situacyi žančynu aburaje toj fakt, što namieśnik dyrektara Minskaha miechaničnaha zavoda Viačasłaŭ Kuźniacoŭ, jaki, jak śćviardžaje Ina, kaliści nie daŭ joj pieravieścisia na skaročany pracoŭny dzień, ciapier idzie ŭ deputaty ad Partyi pracy i spraviadlivaści. A ŭ prahramie hetaj partyi ŭ trecim punkcie, što tyčycca sacyjalnaj palityki, asobnym padpunktam značycca: «Prava žančyn na skaročany pracoŭny dzień».
My źviazalisia ź Viačasłavam Kuźniacovym, ale padrabiazna patłumačyć situacyju jon pahadziŭsia tolki pry asabistaj sustrečy. Tym nie mienš jon zaznačyŭ, što nie ličyć pravilnym źviazvać adnosiny rabotnika zavoda z pradpryjemstvam i deputackuju dziejnaść. A taksama dadaŭ, što jaho pazicyja była vykazanaja rašeńniami suda, jakija jon nie źbirajecca asprečvać.
Čytajcie taksama: