Novy lidar u frystajle — alimpijski čempijon Hanna Huśkova FOTY
Na Alimpijadu ŭ Pchienčchan žanočaja kamanda Biełarusi pa frystajle pajechała z novym lidaram — Hannaj Huśkovaj, jakaja siońnia vyjhrała załaty miedal.
25-hadovaja spartsmienka pravodzić alimpijski siezon mahutniej za Ału Cupier, jakaja paśla trochhadovaj paŭzy viarnułasia ŭ vialiki sport. Pieramožca Sočy-2014 pakul vyhladaje ciomnym konikam: niešta moža, ale što mienavita — niezrazumieła. Najlepšaje dasiahnieńnie Ały paśla kambeku — piataje miesca na etapie Kubka śvietu ŭ Maskvie.
Huśkova, naadvarot, pravodzić samy paśpiachovy siezon u karjery.
U Kitai jana atrymała pieršuju pieramohu na etapach Kubka śvietu, a ŭ ZŠA vyjhrała «srebra». U hienieralnaj kłasifikacyi dziaŭčyna zaniała rekordnaje dla siabie druhoje miesca, krychu sastupiŭšy kitajancy Siuj Mentaa.
Frystajłam Hanna Huśkova pačała zajmacca ŭ siem hadoŭ. Taki ekstremalny vid sportu vybrali dla jaje baćki. Łyžnaja akrabatyka nastolki zachapiła dziaŭčynku, što dziciačyja mary stać fatohrafam ci žurnalistam adyšli na druhi płan.
Zrešty, pasprabavać siabie ŭ roli kamientatara Hańnie adnojčy ŭdałosia: na etapie Kubka śvietu ŭ «Raŭbičach» jana dapamahała Darynie Zapolskaj vieści repartaž dla kanała «Biełaruś-1».
Na Kubku Jeŭropy Huśkova debiutavała ŭ 15 hadoŭ, na Kubku śvietu — u 17. Pieršy surjozny pośpiech u karjery zdaryŭsia ŭ 2012 hodzie — «srebra» na junijorskim čempijanacie śvietu.
Amal uvieś minuły siezon Hanna prapuściła z-za traŭmy. Na treniroŭcy dziaŭčyna niaŭdała pryziamliłasia i paškodziła mienisk — pryjšłosia kłaścisia na apieracyju. Heta byŭ nie pieršy raz, kali prablemy sa zdaroŭjem pieraškadžali frystajlistcy: niekalki hadoŭ tamu jana lehła pad nož z-za razryvu piaredniaj kryžapadobnaj źviazki kalena.
Alimpijada ŭ Sočy stała dla Huśkovaj debiutnaj i skłałasia vielmi niaŭdała. Z-za padzieńnia baraćbu za ŭznaharody Hanna spyniła jašče na stadyi kvalifikacyi. U Pchienčchanie ad novaha lidara zbornaj Biełarusi čakajuć miedaloŭ nie tolki na radzimie.
Naprykład, amierykanskaje ahienctva navinaŭ The Associated Press prahnazuje biełaruscy «srebra».
Spartyŭnaj formie Hanny pazajzdrościać mnohija mužčyny. Za 15 siekund jana zdolnaja padciahnucca 10—11 raz. Zrabić heta z dadatkovaj vahoj (blin 5—10 kh) dla jaje taksama nie prablema
Tatuiroŭki — vialikaja straść Huśkovaj. Levuju ruku dziaŭčyny ŭpryhožvaje abjomnaja kvietka, na pravaj susiedničajuć drapiežnaja puma ź inšaj kvietkaj. Na klučycy ŭ Hanny nabity jaje žyćciovy deviz — Provehito in Altum, što z łatyni pierakładajecca jak «imknisia ŭvyšyniu».
— Deviz nie tolki pra frystajł, choć blizki hetamu vidu sportu. Va ŭsim pa žyćci treba imknucca ŭharu — u tolki navierch i nijakich padzieńniaŭ, — tłumačyć spartsmienka.
Pieršaje tatu źjaviłasia ŭ Huśkovaj ŭ 17 hadoŭ. Baćki na heta adreahavali pa-roznamu. Baćka, u jakoha ruki taksama «zabityja», spakojna, reakcyja maci była radykalnaj: jana razmalavała sabie ruki šarykavaj ručkaj, kab pakazać Hańnie, jak tatuiroŭka budzie vyhladać u 40 hadoŭ. Nijakaha ŭražańnia na dziaŭčynu pierformans maci nie zrabiŭ.
Jašče adno zachapleńnie łyžnaj akrabatki — šyćcio. U Hanny navat jość svaja šviejnaja mašynka, ale z-za ščylnaha hrafika trenirovak i spabornictvaŭ praktykavacca ŭ stvareńni adzieńnia ŭ Huśkovaj niama času. Surjozna zaniacca dyzajnam dziaŭčyna płanuje paśla zakančeńnia spartovaj karjery.
Sočym za Alimpijadaj razam z Bukmiekierskaj kantoraj Marafon.