Sudziać Śviatasłava Baranoviča, jaki ŭdaryŭ milicyjanta ŭ cyvilnym, abaraniajučy ŭdzielnikaŭ «Marša niedarmajedaŭ» FOTA
15 lutaha ŭ sudzie Maskoŭskaha rajona Minska pačaŭsia praces nad Śviatasłavam Baranovičam. Mužčyna niekalki razoŭ udaryŭ supracoŭnika milicyi ŭ cyvilnym, kali toj sprabavaŭ zatrymać pratestoŭcaŭ 15 sakavika.
Ciapier Baranoviču pahražaje da 6 hadoŭ.
Z kastryčnika Śviatasłaŭ znachodzicca ŭ SIZA. Jaho siastra kazała, što vinu Baranovič nie admaŭlaje: tak, udaryŭ, tym bolš, što heta bačna na videa.
Na sudzie toje ž skazaŭ i sam Śviatasłaŭ: maŭlaŭ, vinu pryznaju. Jon navat pryznaŭsia, što razumieŭ - u cyvilnym nie prosta minaki, a milicyjanty.
Adznačym, na pasiadžeńni Baranovič siadzieŭ u kletcy nie adzin - a razam ź milicyjantam, prykavany da jaho kajdankami. Što dziŭna, bo navat zabojcaŭ pakidajuć u «stakanie» adnych.
Paciarpiełym pa spravie pryznany amapaviec Arciom Paŭłaŭ.
Arciom Paŭłaŭ
Spačatku dapytali śviedku, taksama amapaŭca.
«U toj dzień my pracavali na płoščy Banhałor u składzie mabilnaj hrupy. Byli ŭ cyvilnym: pad adzieńniem broniekamizelka, z saboj radyjostancyja, harnitura.
Na prypynku hramadskaha transpartu naša zadača z naparnikam była sieści ŭ tralejbus i jechać. Nazirać za tak zvanymi anarchistami. Ukazańniaŭ zatrymlivać nie było», — uzhadaŭ jon.
«Ci parušali jany [anarchisty] zakanadaŭstva? — spytałasia prakuror.
«Kali ja nie pamylajusia, zabaroniena być u mascy na masavym mierapryjemstvie. Płakaty z nadpisami, barabany… — adkazaŭ śviedka. — Paśla na prypynku pačaŭsia syr-bor. Ludzi pačali kryčać, adzin adnaho chapać, pačalisia zatrymańni adbyvacca. Abvinavačany ŭdaryŭ supracoŭnika AMAPu».
Amapaviec raspavioŭ, što ŭbačyŭ, jak Baranovič dva razy ŭdaryŭ milicyjanta ŭ cyvilnym i paśla adyjšoŭ ubok.
«Ja nie bačyŭ, jaki kankretna supracoŭnik milicyi paciarpieŭ, ale viedaŭ, što heta milicyjant: jon byŭ u sinim spartovym kaściumie, u nas heta takaja pracoŭnaja vopratka», - rastłumačyŭ śviedka.
Prykładna toje ž samaje raspavioŭ i druhi śviedka-amapaviec.
«Tolki momant, jak bili paciarpiełaha, ja nie bačyŭ», - adznačyŭ jon.
***
Nahadajem, što ŭ 2011 hodzie Baranovič užo byŭ sudzimy. Tady jaho pakarali tryma hadami «chatniaj chimii» za ŭdzieł u Płoščy-2010. Pravaabaroncami jon byŭ pryznany palitviaźniem.
Pasiadžeńnie praciahniecca 20 lutaha