U Łatvii antykarupcyjnaje viedamstva zatrymała kiraŭnika Nacbanka
Prezident Banka Łatvii Iłmar Rymševič zatrymany ŭ Ryzie ŭ ramkach kryminalnaha pracesu, paviedamiŭ u niadzielu premjer-ministr krainy Marys Kučynskis.
Premjer sklikaŭ pazačarhovaje pasiadžeńnie ŭrada na paniadziełak. Taksama svajo pazačarhovaje pasiadžeńnie praviadzie Kamisija pa nacyjanalnaj biaśpiecy Sojma.
U svajoj zajavie Marys Kučynskis ničoha nie skazaŭ ab pryčynach zatrymańnia Rymševiča. Kiraŭnik urada adznačyŭ, što infarmacyja budzie pradastaŭlena antykarupcyjnym viedamstvam, kali jano paličyć patrebnym jaje padać.
Ni Biuro pa praduchileńni i baraćbie z karupcyjaj, ni Dziaržaŭnaja palicyja ŭ niadzielu situacyju nie kamientavali. U hutarcy ź Bi-bi-si pradstaŭniki antykarupcyjnaha viedamstva paćvierdzili, što viaduć pracesualnyja dziejańni, jakija datyčacca Banka Łatvii i jaho prezidenta.
Ministr finansaŭ Dana Rejźnijecie-Ozała sklikała terminovuju pres-kanfierencyju ab situacyi ŭ finansavym siektary Łatvii.
«Mahu zapeŭnić, što finansavaja sistema ŭ Łatvii stabilnaja. Toje, z čym my zaraz sutykajemsia, — mižnarodny kryzis reputacyi finansavaha siektara. Jon vyklikany situacyjaj vakoł banka ABLV, jakomu amierykanskija kalehi vykazali surjoznyja paproki», — skazała kiraŭnik minfina Łatvii.