U Biełarusi znajšli i daśledavali zuby raniej nieviadomaha vidu akuły
U navukovym časopisie Estonian Journal of Earth Sciences apublikavanyja vyniki daśledavańnia biełaruskimi i rasijskimi navukoŭcami zuboŭ nieviadomaha vidu akuły, jakija byli znojdzienyja ŭ Homielskaj vobłaści jašče ŭ 1970 hodzie.
Try zuby akuły byli znojdzienyja niepadalok ad Žytkavičaŭ na hłybini 200 mietraŭ padčas pošuku salanych radoviščaŭ na terytoryi našaj krainy. Jany dobra zachavalisia dziakujučy «kansiervacyi» ŭ płastach hliny.
Daśledavańniem zajmalisia śpiecyjalisty BNTU i Sankt-Pieciarburhskaha dziaržaŭnaha ŭniviersiteta Dźmitryj Płaks i Alaksandr Ivanoŭ. Mikratamahrafičnyja daśledavańni dazvolili navukoŭcam daviedacca ab evalucyjnych źmienach zubnoj sistemy ryb.
Pavodle daśledavańnia, z časam kolkaść viaršyniaŭ zuboŭ i kolkaść zubnych kanałaŭ u ryb pamianšałasia, i cykł źmieny zuboŭ stanaviŭsia značna karaciejšym. Novy vid zuboŭ kaža pra nieviadomy dahetul typ charčavańnia akuł i pra toje, što siarod sučasnych akuł takich niama».
Kožny z zuboŭ utrymlivaŭ čatyry asnoŭnyja viaršyni, a ŭsiaho navukoŭcy ich naličyli bolš za dvaccać. Takich zuboŭ daśledčyki nie sustrakali ni ŭ adnoj staražytnaj akuły.
Zakamianiełaści paleazojskaj ery daśledčyki adnieśli da raniej nieviadomaha navucy vidu akuł Tamiobatis i nazvali Tamiobatis elgae (u honar viadomaha estonskaha paleaichtyjołaha Elhi Mark-Kuryk z Talina, jakaja vyvučała znachodki ŭ 1970-ja hady).