Republic: Rasijskaja PVK «Vahnier» maje 3600 bajcoŭ i biudžet 310 miljonaŭ dalaraŭ
Rasijskaje vydańnie Republic, pahutaryŭšy ź niekalkimi bajcami pryvatnaj vajskovaj kampanii «Vahnier» i aficerami Minabarony Rasii i FSB, vyśvietliła, što PVK naličvaje zvyš 3600 čałaviek i abychodzicca ŭ sumu da 310 miljonaŭ dalaraŭ ZŠA.
«Hrupa Vahniera», samaja viadomaja ŭ Rasii pryvatnaja vajskovaja kampanija, u lutym akazałasia ŭ centry ŭvahi z-za strat, jakija jana paniesła ŭ sutyknieńni pad siryjskim horadam Dejr-ez-Zoram. Najmity biaruć udzieł u bajavych dziejańniach na Blizkim Uschodzie ŭžo dva z pałovaj hady, a da taho byli zaŭvažanyja na paŭdniovym uschodzie Ukrainy.
Upieršyniu rasijskija najmity źjavilisia ŭ Siryi ŭ 2013 hodzie: hrupa bajcoŭ, nabranych kampanijaj «Słavianski korpus», pavinna była achoŭvać naftapravod i skład na ŭschodzie Siryi, u Dejr-ez-Zory, ale zamiest hetaha im zahadali padtrymać paŭstancaŭ u pravincyi Choms, dzie kantraktniki ŭ vyniku patrapili ŭ zasadu bajevikoŭ «Isłamskaj dziaržavy». Nie majučy nieabchodnaj techniki i sučasnaha ŭzbrajeńnia, najmity paciarpieli parazu i ŭ kastryčniku pakinuli Blizki Uschod. Kiraŭniki «Słavianskaha korpusa» Jaŭhien Sidaraŭ i Vadzim Husieŭ byli asudžany pa artykule «najmictva» (praduhledžvaje da 15 hadoŭ pazbaŭleńnia voli) i atrymali pa try hady kałonii.
Viasnoj 2014 hody bajcy z «hrupy Vahniera» byli zaŭvažanyja ŭ Krymie, a zatym prymali ŭdzieł u padziejach na paŭdniovym uschodzie Ukrainy.
Kiruje PVK Dźmitryj Utkin; Vahnier — jaho pazyŭny. U śniežni 2016 hoda jon razam z kalehami pabyvaŭ na kramloŭskim pryjomie i navat sfatahrafavaŭsia z Pucinym.