Bajcu MMA, jaki vioz narkotyki i na miažy pabiŭsia z mytnikami, dali dzieviać hadoŭ turmy
28 lutaha ŭ Breście abviaścili prysud pa abvinavačvańni 27-hadovaha bajca źmiašanych adzinaborstvaŭ u niezakonnym abarocie narkotykaŭ.
Maładoha čałavieka pryznali vinavatym u niezakonnym pieramiaščeńni praź miažu asabliva niebiaśpiečnaha psichatropnaha rečyva ŭ bujnym pamiery, a taksama niezakonnym abarocie narkotykaŭ.
Sud Maskoŭskaha rajona pryznačyŭ abvinavačanamu 9 hadoŭ pazbaŭleńnia voli. Ab hetym paviedamiŭ TUT.BY brescki transpartny prakuror Valeryj Karaluk.
Prysud nie ŭstupiŭ u zakonnuju siłu i moža być abskardžany.
Uvahu mytnikaŭ małady čałaviek pryciahnuŭ u listapadzie minułaha hoda, kali jechaŭ na asabistym aŭto z Polščy pa zialonym kalidory ŭ punkcie propusku «Brest». Jaho pavodziny naściarožyli mytnikaŭ, i aŭtamabil nakiravali ŭ boks pahłyblenaha nadhladu. Kali bajcu MMA prapanavali dać asabistyja rečy dla nadhladu, jon dastaŭ z kišeni kurtki mabilny telefon i palčatku. Paśla pačatku nadhladu jon adšturchnuŭ supracoŭnika mytni i pasprabavaŭ vybiehčy, a taksama akazvaŭ supraciŭ. Paśla zatrymańnia ŭ parušalnika vyjavili narkatyčnyja rečyvy.
Na sudovym pasiadžeńni jon całkam pryznaŭ vinu i skazaŭ, što narkotyki vioz dla prodažu. Za svoj tavar spadziavaŭsia vyručyć 250 dalaraŭ.