Hieołahi raspaviali, dzie moža adbycca nastupny pieravarot palusoŭ Ziamli
Hieołahi vyvučyli vahańni ŭ sile mahnitnaha pola Ziamli za apošnija dźvie tysiačy hadoŭ i pryjšli da vysnovy, što nastupny pieravarot jaje kancavośsiaŭ adbudziecca ŭ asablivym punkcie na terytoryi Paŭdniovaj Afryki, havorycca ŭ daśledavańni, apublikavanym u časopisie Geophysical Research Letters.
Dva hady tamu Džon Tarduna z univiersiteta Račestera i jaho kalehi ździejśnili adkryćcio: jany vyjavili mahnitnuju anamaliju na terytoryi Paŭdniova-Afrykanskaj Respubliki la bierahoŭ raki Limpapo, dzie siła pola rezka padała i źnižałasia da krytyčna nizkich značeńniaŭ u XIII—XVI stahodździach. Heta pakazała na toje, što pieravaroty palusoŭ Ziamli adbyvajucca nie vypadkovym čynam, a ŭ asablivych punktach z anamalnymi ŭłaścivaściami.
Navukoŭcy źviarnuli ŭvahu na toje, što rytuały, jakija miascovyja plamiony bušmienaŭ tradycyjna vykarystoŭvajuć dla ačystki svaich pasieliščaŭ ad złych duchaŭ i nasiakomych, majuć adzin pabočny efiekt: spalvajučy svaje chaty, zahony dla žyvioły i inšyja pabudovy, abaryhieny «zapisvali» infarmacyju pra siłu, raźmiaščeńnie palusoŭ i inšyja ŭłaścivaści mahnitnaha pola Ziamli ŭ adkładach hliny, pa-nad jakimi byli pabudavanyja ichnija pasieliščy.
Raźmiaščeńnie anamalnaje zony na karcie i daśledavany materyjał
Mnohija parody, u tym liku i hlina, utrymlivajuć u sabie atamy žaleza, u jakich «zapisanaja» infarmacyja ab tym, kudy było paviernuta mahnitnaje pole płaniety i jakuju siłu jano mieła ŭ momant ich farmiravańnia.
Jak akazałasia, mahnitnaje pole Ziamli rezka asłablałasia ŭ peŭnym punkcie Afryki jak minimum try razy: u 400—450 hadach našaj ery, u pačatku VIII stahodździa i ŭ pramiežku pamiž 1225—1550 hadami. Hetyja asłableńni, jak ličać navukoŭcy, źviazanyja z ahulnym padzieńniem siły mahnitnaha pola Ziamli, jakoje nazirajecca ŭ apošnija 160 hadoŭ.
Usio heta, na dumku Tarduna, pakazvaje na toje, što paŭdniovaafrykanskaja mahnitnaja anamalija sapraŭdy źjaŭlajecca asablivym punktam na pavierchni Ziamli. U minułym tam užo adbyvalisia pieravaroty mahnitnych palusoŭ, i, imavierna, heta paŭtorycca ŭ najbližejšaj budučyni.