Biełarus Kirył Relich staŭ čempijonam śvietu pa boksie, pieramoha razhromnaja
Ranicaj (pa minskim časie) 11 sakavika ŭ San-Antonia adbyŭsia boj za vakantny pojas čempijona śvietu WBA ŭ paŭsiaredniaj vazie (da 63,5 kh) pamiž biełarusam Kiryłam Relicham i niabitym kubincam Ranziesam Bartelemi.
Heta była ich druhaja sustreča: u papiarednim bai sudździ addali pieramohu Bartelemi, chacia boj jon dakładna nie vyjhraŭ.
Tady vyjšaŭ skandał z pryznačeńniem nieadkładnaha revanšu, a sudździam pieršaha boju WBA vykazała niedavier.
Druhi boj ad samaha pačatku prajšoŭ pad dyktoŭku biełarusa, Bartelemi nie zdoleŭ pakazać ničoha čempijonskaha: jon pravioŭ custreču ŭ abaronie, pieryjadyčna vykidvajučy amatarskija ŭdarnyja sieryi z chukaŭ, jakija nie nanosili škody Relichu.
Aproč taho, kubiniec baksiravaŭ vielmi brudna: jon, jak kažuć baksiory, «usiu darohu łupiŭ pa šarach», udaryŭšy nižej za pojas prynamsi piać razoŭ.
I kali čatyry razy heta hladziełasia jak byccam by nienaŭmysna, to ŭ 12-m raŭndzie jon udaryŭ u pach naŭprostavym udaram.
U vyniku, lik u sustrečy atrymaŭsia prosta razhromnym pa viersijach usich sudździaŭ.
Kirył Relich — novy čempijon śvietu!
«Jak heta, stać čempijonam śvietu ź Biełarusi?» — spytali ŭ jaho adrazu paśla boju.
«Heta była maja mara, maja meta, da jakoj ja išoŭ 20 hod», — skazaŭ Relich.
Nastupny boj Relich choča pravieści ź pieramožcam boju Majki Harsija — Siarhiej Lipiniec, kab abjadnać svoj čempijonski tytuł WBA z tytułam IBF. Jak stała viadoma siońnia, Majki Harsija staŭ čempijonam śvietu pa viersii IBF u pieršaj paŭsiaredniaj vazie.
Relich, nahadajem, pazaletaś sprabavaŭ adabrać tytuł čempijona śvietu ŭ Ryki Biornsa, i navat adpraviŭ jaho na padłohu, ale tady ekśpierty syšlisia ŭ dumcy, što niemahčyma adabrać pojas u brytanca pry sudździach brytancach, kali boj prachodzić u Brytanii.
***
Kirył Relich pachodzić z Baranavič, z žonkaj u ich dvoje dziaciej.
Doŭhi čas Kirył treniravaŭsia ŭ minskaha śpiecyjalista Siarhieja Pytaleva, potym pierajšoŭ da kolišniaj brytanskaj zorki Ryki Chatana, ale pakinuŭ jaho kamandu praz «psichałahičny dyskamfort».
Da čempijonskaha boju Relich spačatku rychtavaŭsia ŭ Minsku sa svaim siabram i trenieram Siarhiejem Rabčankam, ale potym, praz ultymatum arhanizataraŭ boju, vylecieŭ u trenirovačny łahier u ZŠA.