Rasija pahražaje ZŠA «surjoznymi nastupstvami» ŭ vypadku udaraŭ pa Siryi
Pradstaŭnik Rasii ŭ AAN Vasilij Niabienzia paviedamiŭ, što Maskva papiaredziła ZŠA ab surjoznych nastupstvach, kali Štaty vyrašać nanieści ŭdar pa siryjskich vojskach. Nahadajem, što Donald Tramp raniej pryhraziŭ, što adkaznyja za chimičnyja ataki ŭ Siryi «doraha zapłaciać».
«Jak nieadnarazova zajaŭlała naša Ministerstva abarony, pa zaprašeńni siryjskaha ŭrada tam na zakonnych padstavach znachodziacca rasiejskija vajskoŭcy. My nieadnarazova papiaredžvali amierykanski bok ab mahčymych vielmi niehatyŭnych nastupstvach mahčymaha ŭžyvańnia imi zbroi suprać zakonnaha siryjskaha ŭrada i, u asablivaści, kali ŭžyvańnie hetaj zbroi, nie daj boh, viadoma, začepić našych vajskoŭcaŭ, jakija zakonna znachodziacca ŭ Siryi», — skazaŭ rasijski dypłamat na pasiadžeńni Rady biaśpieki AAN.
«Toje, što my čujem zaraz, śviedčyć pra toje, što razhladajecca vajenny scenar, što vielmi niebiaśpiečna, i my sprabujem heta padkreślić». «Jak mnie zdajecca, jany pierasiakajuć niebiaśpiečnuju tonkuju liniju, što niebiaśpiečna samo pa sabie i dla śvietu», — dadaŭ Niabienzia.
Na prośbu prakamientavać prajekt rezalucyi, prapanavany ZŠA pa Siryi, Vasil Niebienzia adznačyŭ, što jon «źmiaščaje ceły šerah nieprymalnych pałažeńniaŭ», a ŭniesienyja tudy amierykanskim bokam papraŭki «robiać jaho jašče horšym».
Rasija i Damask nazyvajuć paviedamleńni ab novaj chimičnaj atacy ŭ siryjskaj Dumie pravakacyjaj.
«Ciapier navat nichto i nie słuchaje pra toje, što nie było nijakaj chimičnaj ataki. Zapuščany praces, jaki, na žal, moža skončycca vielmi drenna», — skazaŭ Niabienzia.
Uviečary 9 krasavika Rada Biaśpieki AAN sabrałasia na pasiadžeńnie, na jakim abmiarkoŭvałasia mierkavanaja chimičnaja ataka ŭ siryjskim horadzie Duma. Adkaznaść za jaje ZŠA, Vialikabrytanija i Francyja ŭskładajuć na siły Bašara Asada, Rasiju i Iran abvinavačvajuć u tym, što jany padtrymlivajuć siryjski režym.
Złučanyja Štaty razhladajuć varyjant mižnarodnaha vajennaha adkazu na mierkavanuju chimičnuju ataku ŭ siryjskim horadzie Duma. Pra heta paviedamlaje ahienctva Reuters sa spasyłkaj na krynicy va ŭradzie ZŠA.
Surazmoŭcy vydańnia kankretnych płanaŭ nie raskryli, ale paviedamili, što metami, pa jakich mohuć być naniesienyja ŭdary, mohuć stać abjekty, źviazanyja z prahramaj chimičnaj zbroi ŭ Siryi.
Ahienctva sa spasyłkaj na apytanych ekśpiertaŭ nazyvaje mahčymaj metaj i aeradrom Chmiejmim, dzie bazujucca rasijskija VKS.