MZS Rasii abvinavaciła Vialikabrytaniju ŭ datyčnaści da zabojstva Raspucina
Pradstaŭnik MZS Rasii Maryja Zacharava abvinavaciła brytanskija śpiecsłužby ŭ zabojstvie Hryhoryja Raspucina. Vystupajučy na bryfinhu, jana zajaviła, što takija vysnovy možna zrabić paśla pračytańnia knihi byłoha ahienta Skotłand-Jarda Ryčarda Kalena, u jakoj nibyta pryvodziacca archiŭnyja dakumienty aficeraŭ brytanskaj raźviedki.
Akramia taho, pa słovach Zacharavaj, Łondan datyčny da hibieli rasijskaha impieratara Paŭła I i palityčnaha dziejača Konha Patrysa Łumumby. Usie hetyja zabojstvy pradstaŭnik MZS nazvała dziaržaŭnymi zamovami. Zacharava nazvała Vialikabrytaniju «suśvietnym rekardsmienam pa hienacydzie». Pa jaje acenkach, brytancy źniščyli da 95% abaryhienaŭ Aŭstralii padčas kałanizacyi.
Zacharava adznačyła, što zrabiła hetyja zajavy ŭ adkaz na abvinavačvańni brytanskich uładaŭ u dačynieńni Rasii da zamoŭlenych zabojstvaŭ za miažoj. Łondan ličyć, što za napadam na byłoha ahienta HRU Siarhieja Skrypala i jaho dački ŭ brytanskim horadzie Sołśbiery 4 sakavika staić mienavita Rasija. Pa dadzienych śledstva, Skrypaloŭ atrucili niervova-paralityčnym rečyvam «Navičok», vyrablenym na rasijskaj terytoryi. Rasija ŭsie abvinavačvańni admaŭlaje.