Labiedźka sychodzić: palityk pakidaje kiravańnie AHP paśla 18 hadoŭ staršynstva
U chutkim časie maje adbycca źjezd Abjadnanaj hramadzianskaj partyi, dzie adbuducca vybary novaha staršyni.
Hetym razam kandydatury na lidarstva dźvie, i siarod ich niama Anatola Labiedźki — baraćba razhorniecca pamiž Vasilom Palakovym i Hannaj Kanapackaj.
Vychodzić, paśla 18 hadoŭ lidarstva ŭ partyi Anatol Labiedźka vyrašyŭ syści? Pra heta palityk raskazaŭ «Našaj Nivie».
«Heta praŭda, ciapier ja zajmajusia svaimi nadzionnymi spravami i nie maju ŭ svaim hrafiku punkta ab bałatavańni ŭ staršyni AHP. Čym budu zajmacca dalej? Vaźmu niejki tajm-aŭt, vyznačusia…», — skazaŭ Labiedźka.
My paprasili jaho padsumavać 18 hod svajho staršynstva ŭ partyi.
«Samaacenka budzie chiba što niasłušnaj — chaj inšyja aceniać. Hałoŭnaje, pry siońniašniaj chlipkaści biełaruskaj partyjnaj sistemy AHP, usio ž taki, na fonie inšych palityčnych struktur vyhladaje, mnie padajecca, trochi lepš. Z hledzišča patencyjału, infrastruktury, zachavańnia tradycyj. Viadoma, što samaja hałoŭnaja prablema, jakaja zaminała nam raźvivacca — heta adsutnaść vybaraŭ. Voś, heta toje čaho brakuje, što nie daje mahčymaści zirnuć, jaki realny patencyjał partyi», — skazaŭ Labiedźka.
My taksama ŭdakładnili, ci nie moža paŭtarycca takoj, ułaścivaj Biełarusi situacyi, kali kiraŭniki partyj, straciŭšy lidarstva, stvarali niejkija alternatyŭnyja ruchi.
«Nie, takich płanaŭ u nas niama, — skazaŭ Labiedźka. — Ja čałaviek kaštoŭnasny i ideałahičny. Tyja ludzi, jakija ŭ partyi, jany dla mianie kamfortnyja jak dla palityka i kaštoŭnyja jak dla čałavieka».