«Zhodnyja na sustreču». Maci-328, jakija abviaścili haładoŭku, zaprasili ŭ Administracyju prezidenta
U Kalinkavičach maci asudžanych pa artykule 328 KK RB (Niezakonny abarot narkatyčnych srodkaŭ, psichatropnych rečyvaŭ, ich prekursoraŭ i anałahaŭ) praciahvajuć haładoŭku. U subotu ich zaprasili ŭ Administracyju prezidenta. Sustreča maje adbycca 2 maja ŭ 16.00.
Zaraz u kvatery ŭ Kalinkavičach haładaje šeść čałaviek, zaŭtra ich budzie siem.
— U piatnicu, prykładna a 20:30, da nas pryjšli Viktar Zamościk — staršynia Kalinkavickaha rajonnaha Savieta deputataŭ i Siarhiej Hvozdź — staršynia Kalinkavickaha rajvykankama, — raspaviadaje arhanizatar akcyi Taćciana Kanieŭskaja. — Skazali, im paviedamili pra nas, i 2 maja zaprasili nas u Administracyju prezidenta.
Adkaz maci dali nie adrazu. Ad sustrečy maci nie admovilisia, ale da ranicy suboty skłali śpis čynoŭnikaŭ, ź jakimi chacieli b sustrecca. Siarod ich — staršynia Viarchoŭnaha suda Valancin Sukała, hienprakuror Alaksandr Kaniuk, kiraŭnik SK Ivan Naskievič, kiraŭnik MUS Ihar Šunievič, śpikier Pałaty pradstaŭnikoŭ Uładzimir Andrejčanka, śpikier Savieta Respubliki Michaił Miaśnikovič, dyrektar Nacyjanalnaha centra zakanadaŭstva i pravavych daśledavańniaŭ Vadzim Ipataŭ, pamočnik prezidenta pa pytańniach nacyjanalnaj biaśpieki Viktar Łukašenka.
— My nie vypadkova chočam bačyć mienavita hetych ludziej, — praciahvaje Taćciana. — Mienavita jany mohuć dapamahčy i vykanać dva našyja patrabavańni: stvaryć kamisiju, jakaja b zaniałasia pierahladam spraŭ pa artykule 328, źmiakčyć artykuł 328 KK.
Ranicaj maci pieradali hety śpis Viktaru Zamościku.
— Niadaŭna čynoŭnik znoŭ nas naviedaŭ. Skazaŭ, usie hetyja ludzi zhodnyja na sustreču i zapisaŭ našy pašpartnyja dadzienyja, — kaža Taćciana. — 2 maja ŭ 16.00 nas čakajuć u Administracyi prezidenta.
Spyniać haładoŭku žančyny nie majuć namieru.
— U Minsk my pajedziem hałodnyja, — nie adstupaje ad svaich rašeńniaŭ Taćciana. — My chočam źmienaŭ, tamu hatovyja iści da kanca.