2000 maładych katalikoŭ sabralisia na źlot u Hrodnie FOTY
Kala dźviuch tysiač udzielnikaŭ ź dziasiatkaŭ parafij Biełarusi źjechalisia ŭ Hrodna na III usiebiełaruskija dni katalickaj moładzi Biełarusi, pieradaje catholic.by. Deviz sustrečy — «Paklikanyja z Maryjaj da žyćcia ŭ łascy Božaj!».
Pieršuju imšu 29 krasavika ŭznačaliŭ Apostalski nuncyj u Biełarusi arcybiskup Habar Pinter. Jaje kancelebravali biełaruskija biskupy na čale ź Mitrapalitam Tadevušam Kandrusievičam i Apostalskim vizitataram dla hreka-katolikaŭ Biełarusi archimandrytam Janam Siarhiejem Hajekam.
Arcybiskup Habar Pinter adznačyŭ, što jak pradstaŭnik Śviatoha Ajca ŭ Biełarusi jon u čarhovy raz pierakanaŭsia, što Kaścioł tut małady i dynamičny. «Papa i Kaścioł vieryć u vas. Darahija maładyja siabry, Kaścioł u Biełarusi vieryć u vas!» — padkreśliŭ ijerarch.
Zhadvajučy prykład Maryi, jakaja była jašče zusim junaj, kali Boh daručyŭ Joj važnaje zadańnie, arcybiskup źviarnuŭsia da moładzi: «Siońnia heta vy — poŭnyja siły i enierhii. Vykarystajcie heta, kab palepšyć śviet, pačynajučy z vašaha asiarodździa».
Vitajučy haściej, ardynaryj Hrodzienskaj dyjacezii biskup Alaksandr Kaškievič pažadaŭ usim udzielnikam, kab «dni, praviedzienyja ŭ histaryčnym horadzie Stefana Batoryja, paznačanyja prysutnaściu sv. Kazimira, byli pieražytyja jak najlepš — na chvału Božuju i dla duchoŭnaj karyści».