Minskija lekary zrabili mabilny dadatak dla biaśpiečnaha zaharu
Kanstancin Šmialoŭ i Pavieł Čechaŭ — pa adukacyi lekary prafiłaktyčnaj miedycyny. Vyvučyŭšy dadatkova prahramavańnie, jany vypuścili svoj pieršy prajekt — dadatak HealthySun. Jon dapamahaje čałavieku vyznačyć aptymalny čas znachodžańnia na soncy i nie zhareć, piša Dev.by.
Dla adnych karystalnikaŭ heta zručnaje kaśmietyčnaje rašeńnie, dla inšych — prafiłaktyka zachvorvańniaŭ skury.
Asnoŭnaja aŭdytoryja dadatku — u ZŠA, Aŭstralii i Novaj Ziełandyi. U Štatach tradycyjna vysokaja cikavaść da takich dadatkaŭ, a astraŭnym krainam dadaje prablem azonavaja dzirka, tamu piakučaje sonca dla miascovych žycharoŭ — nadzionnaje pytańnie. Biełarusy taksama mohuć spampavać dadatak, ale, jak raspaviadajuć Kanstancin i Pavieł, navat padčas padarožžaŭ ludzi čamuści ličać za lepšaje zhareć na soncy.
Dadatak chłopcy vypuskali svaimi siłami. Ułasnych srodkaŭ chapiła dla raspracoŭki praduktu pad iOS. Ciapier prajekt šukaje inviestycyi nie tolki pad inšyja sistemy, ale i kab zrabić z dadatku piersanalizavanaha pamočnika, jaki b apracoŭvaŭ dadzienyja i vydavaŭ rekamiendacyi.
Pra vialiki prybytak chłopcy nie dumajuć. Zaraz jany manietyzujuć dadatak, kab elemientarna akupić vydatki.
— Heta nišavy dadatak. Ludzi, jakim jon treba, karystajucca i buduć karystacca. Nam pišuć vodhuki, zadajuć pytańni. Ci stanie heta masavym praduktam? Nie! Ale jon i nie płanavaŭsia jak masavy, — padsumavaŭ adzin z zasnavalnikaŭ prajekta Kanstancin Šmialoŭ.