ŚMI: Maradona atrymaŭ prapanovy ad zbornaj Biełarusi i dvuch biełaruskich kłubaŭ
Arhiencinski trenier Dyjeha Maradona moža praciahnuć karjeru ŭ Turcyi, Kuviejcie abo Saudaŭskaj Aravii. Taksama ŭ śpiecyjalista jość prapanovy ad dvuch biełaruskich kłubaŭ i nacyjanalnaj zbornaj. Pra heta paviedamlaje italjanskaje vydańnie Corriere Della Sera sa spasyłkaj na telekanał TyC Sports.
«U najbližejšyja dni ŭ nas budzie bolš dakładnaje ŭjaŭleńnie pra heta pytańnie, ale ŭ lubym vypadku heta vielmi važnyja prapanovy, jakija, biezumoŭna, palepšać budučyniu Maradony», — skazaŭ advakat Maradony Macijas Morli.
«Biełaruskaj prapanovie sapraŭdy niemahčyma admović, i nie tolki z ekanamičnaha punktu hledžańnia, ale i sa spartyŭnaj», — jak pieradaje krynica, skazali ludzi z akružeńnia Maradony, paviedamlaje Tribuna.com
Raniej paviedamlałasia, što Maradona moža ŭznačalić bresckaje «Dynama». Mahčyma, heta niepraŭdzivaja infarmacyja.
Apošnim miescam pracy arhiencinca byŭ kłub «Al-Fudžajra», jaki vystupaje ŭ druhim pa sile dyvizijonie čempijanatu AAE. U siezonie 2017/2018 kłub zaniaŭ treci radok turnirnaj tablicy, spyniŭšysia ŭ kroku ad pavyšeńnia ŭ kłasie.
***
Maradona — čempijon śvietu pa futbole 1986 h. u jakaści hulca. Na radzimie ŭ 1999-m arhiencinca pryznali najlepšym spartsmienam stahodździa. Futbalist taksama ŭznačalvaŭ nacyjanalnuju zbornuju svajoj krainy z 2008 pa 2010 hod.
Darečy, u žniŭni 2010 hoda ŭ Minsku pravodziŭsia tavaryski matč Biełaruś — Arhiencina, łacinaamierykanskuju kamandu i pryvoziŭ Dyjeha Maradona.
Jak kłubny trenier Maradona taksama papracavaŭ u takich kamandach, jak arhiencinskija «Tekstył Mandyju» i «Rasinh», emiracki «Al-Vasł».