SK spyniŭ spravu ab hibieli ŭ Piečach Michaiła Bieŭziuka
17 traŭnia Śledčy kamitet spyniŭ spravu ab daviadzieńni da samahubstva sałdata terminovaj słužby Michaiła Bieŭziuka z Azaryčaŭ. Papiaredniaje rasśledavańnie ciahnułasia roŭna paŭhoda i nie znajšło składu złačynstva ŭ śmierci chłopca. Paviedamleńnie pra heta atrymaŭ Juryj Biaŭziuk, brat zahinułaha sałdata, paviedamlaje Jeŭraradyjo.
19 sakavika 2015 hoda Michaił Biaŭziuk patelefanavaŭ bratu ź Piečaŭ, dzie prachodziŭ słužbu, z prośbaj pryjechać da jaho ŭ bližejšyja vychodnyja i pryvieźci nieabchodnyja rečy. 20 sakavika Michaił znoŭ zatelefanavaŭ bratu i ŭdakładniŭ śpis nieabchodnych rečaŭ. A zranku 21 sakavika Juryju Bieŭziuku zatelefanavali z vajskovaj čaści i paviedamili, što Michaił paviesiŭsia.
Sprava Michaiła Bieŭziuka prahučała ŭ ŚMI paśla rezanansnaj hibieli ŭ Piečach 21-hadovaha pinčuka Alaksandra Koržyča. Juryj Biaŭziuk pastaviŭ pad sumnieŭ aficyjnuju viersiju pra suicyd brata ŭ vojsku. Z dapamohaj pravaabaroncy Leanida Sudalenki jon źviarnuŭsia ŭ Śledčy kamitet, patrabujučy pačać kryminalnuju spravu pa fakcie mahčymaha daviadzieńnia maładoha sałdata da samahubstva.
Adnak rasśledavańnie nie adkryła novych abstavinaŭ u śmierci Michaiła Bieŭziuka. Jaho svajaki majuć prava aznajomicca z materyjałami kryminalnaj spravy. Taksama jany mohuć abskardzić pastanovu ab spynieńni papiaredniaha rasśledavańnia ŭ prakuratury ci ŭ sudzie.