Pad Łunincam masavaja bojka ź bitami «viaskovych» z «haradskimi» skončyłasia śmierciu rasijanina
Na bierazie Cny ŭ Łuninieckim rajonie adbyłasia vialikaja bojka pamiž haradskimi i viaskovymi. Na nastupny dzień było znojdziena cieła 32-hadovaha mužčyny.
Zaraz Śledčy kamitet vyśviatlaje pryčynu śmierci, pa fakcie bojki raspačataja kryminalnaja sprava pa č. 3 art. 339 KK (Chulihanstva, ździejśnienaje z prymianieńniem zbroi, inšych pradmietaŭ, jakija vykarystoŭvajucca ŭ jakaści zbroi dla pryčynieńnia cialesnych paškodžańniaŭ).
— Usio zdaryłasia ŭ subotu ŭ vioscy Drebsk, dva miascovyja chłopcy išli na dzień naradžeńnia, a ŭ adnym z damoŭ adpačyvali haradskija. Nie viedaju, praz što, ale pamiž imi zdaryłasia bojka, — raspaviadaje TUT.BY Mikałaj Vasiljevič, baćka 23-hadovaha paciarpiełaha Ramana. — Jak raspaviadaŭ syn, viaskovyja chłopcy pajšli na rečku, haradskija vyklikali svaich siabroŭ. Pryjechali ŭ 23.00 ź bitami na piaci lehkavych aŭtamabilach i adnym mikraaŭtobusie. Pavodle jaho słoŭ, bili ŭsich zapar: i chłopcaŭ, i dziaŭčat. U Romy nievialikija hiematomy na hałavie, rany na nahach, bili pa rebrach.
23-hadovaha Ramana adrazu dastavili ŭ balnicu, na nastupny dzień vypisali. Ciapier jon daje pakazańni ŭ Śledčym kamitecie.
U niadzielu na miescy zdareńnia ŭ vioscy Drebsk pracavała apieratyŭna-śledčaja hrupa.
— U hety ž dzień u 14.45 milicyjanieram-kiroŭcam za 200 mietraŭ ad bieraha raki Cny byŭ znojdzieny trup mužčyny biez bačnych prykmiet hvałtoŭnaj śmierci. Pa fakcie śmierci mužčyny pravodzicca pravierka, pryznačana sudova-miedycynskaja ekśpiertyza, — kamientuje TUT.BY Dźmitryj Ivaniuk, aficyjny pradstaŭnik Śledčaha kamiteta pa Bresckaj vobłaści.
Zahinułamu 32 hady, jon pryjechaŭ u Biełaruś z Murmanska razam ź siabram, kab adpačyć. U SK adznačajuć, užo vyjaŭlena: žychar RF viečaram u subotu razam z kampanijaj adpačyvaŭ na bierazie Cny, a zatym zdaryłasia bojka, u jakoj jany, pa papiaredniaj infarmacyi, taksama ŭdzielničali.