Kazačnaje adzieńnie biełaruskaj dyzajnierki, rasfarbavanaje z dapamohaj karanioŭ, jahad i nasieńnia FOTY
Kaciaryna Kabanava šmat hod pracavała psichaterapieŭtam: lačyła ludziej i vykładała ŭ miedycynskim univiersitecie. Ale adnojčy całkam źmianiła rod dziejnaści i syšła ŭ dyzajn. Ciapier jana maluje karciny, ale nie na pałatnie, a na tkaninie. A ŭ jakaści pendźlikaŭ u Kaciaryny vystupajuć kvietki i raśliny. Taki naturalny padychod da stvareńnia adzieńnia — fundamient brenda POET.KA.
Kaciaryna Kabanava ŭ svajoj sukiency.
«Pryroda Biełarusi natchniaje i ŭzbahačaje mianie, dumaju, mienavita heta pryviało mianie da naturalnaha afarboŭvańnia. I praz svoj zaniatak ja pieradaju hetuju luboŭ inšym ludziam, kab jany ŭpryhožvali siabie», — raskazvaje Kaciaryna.
Pieršaj rečču, jakuju stvaryła dyzajnierka, byŭ šaŭkovy šalik, afarbavany z dapamohaj raślin. Paśla było šmat ekśpierymientaŭ z roznymi tkaninami (bavoŭnaj, poŭściu, šoŭkam) i raślinami (kvietki, liście, jahady, karani i nasieńnie). Jana zvaryła sotni nastojaŭ i zrabiła tysiačy adbitkaŭ, kab siońnia stvarać toje, što vy možacie bačyć na fotazdymkach.
Darečy, raśliny Kaciaryna źbiraje pa ŭsioj Biełarusi, ale čaściej za ŭsio instrumientam dla tvorčaści stanoviacca kvietki i liściki ź jaje ŭčastka.
U kamandzie Kaciaryny, akramia jaje samoj, jość markietołah, švački, kanstruktar, majstar, jakaja vałodaje technikaj šyćcia z abrezkaŭ, i śpiecyjalist pa techničnaj padtrymcy internet-kramy.
«Mnie vielmi chočacca pavialičyć abarot prodažaŭ ad svaich vyrabaŭ. Adnak ručnaja praca patrabuje šmat sił i asablivaha pakupnika, tamu ŭ Poet.ka źjaviacca bazavyja rečy z naturalnych tkanin. U najbližejšaj budučyni ja taksama płanuju adkryćcio svajho mahazina, dzie chaču sabrać vyraby tych dyzajnieraŭ, jakija blizkija majoj fiłasofii: naturalnaści, ekałahičnaści, składanaści i pryhažości», — padzialiłasia z «Ninaj» płanami dyzajnierka.
Darečy, psichaterapieŭtyčnaja praktyka taksama zastałasia ŭ žyćci dyzajnierki, choć krychu i ŭ inšym vyhladzie: žančyna viadzie svoj fiłasofski akaŭnt u instahramie i fejsbuku i čytaje etyka-psichałahičnyja lekcyi.