«Jany abniali jaho — i ŭsie troje patanuli». Padrabiaznaści hibieli ŭ Mastoŭskim rajonie mužčyny i dvuch chłopčykaŭ
Trahiedyja, jak paviedamlałasia, adbyłasia ŭviečary 9 červienia ŭ Mastoŭskim rajonie. U miescy źlićcia Niomana i Ščary patanuli dvoje chłopčykaŭ, a taksama mužčyna, što sprabavaŭ ich vyratavać — 44-hadovy baćka 8-hadovaha dziciaci, piša Tut.by.
Na hetaje miesca kala dźviuch rek siemji ź Vialikaj Bierastavicy i pasiołka Krasnasielski Vaŭkavyskaha rajona pryjazdžali kožny hod parybačyć. Voś i ŭ hetyja vychodnyja darosłyja z dvuma dziećmi — 8-hadovym i 14-hadovym chłopčykami — byli na svaim tradycyjnym miescy. Pryjechali siudy jany ŭ hadzinu dnia. Kala piaci viečara chłopcy paprasilisia vykupacca. Darosłyja dazvolili: u miescy źlićcia dźviuch rek jość nievialikaja piasčanaja kasa, dzie niehłyboka. Ale prablema hetaha miesca ŭ tym, što kasa vielmi rezka abryvajecca — i dzieci nie zaŭvažyli, jak apynulisia na hłybini. Jany stali tanuć i klikać na dapamohu. Baćki kinulisia ŭ vadu.
— Baćka 8-hadovaha chłopčyka padchapiŭ dziaciej. Jany abniali jaho. Na žal, navyki pa vyratavańni ŭ darosłaha byli słabymi — i ŭ vyniku ŭsie troje patanuli.
Ich cieły znajšli na hłybini vadałazy Mastoŭskaj vyratavalnaj stancyi, — raspaviali TUT.BY u Hrodzienskaj abłasnoj arhanizacyi Biełaruskaha respublikanskaha tavarystva vyratavańnia na vodach.
Pa słovach znajomych, patanuły mužčyna ŭmieŭ dobra płavać, ale, vierahodna, pad ciažaram dvuch cieł jon pajšoŭ na dno.
Paźniej u SK zajavili, što niezadoŭha da taho, što zdaryłasia, mužčyny vypivali.
U Hrodzienskaj abłasnoj arhanizacyi Asvod kažuć, što Nioman — raka padstupnaja. Tut šmat padvodnych płyniaŭ, jam i abryvaŭ. Kupacca tut možna tolki ŭ abstalavanych miescach. Kali ž čałaviek pačynaje tanuć, to śpiecyjalisty rajać u hetym vypadku nie panikavać, nie płyć suprać płyni, a naadvarot — paddacca joj, jana abaviazkova vyniesie da bieraha.