Čynoŭnik «ŁNR»: Łuhansk moža zastacca ŭ składzie Ukrainy
Pry vykanańni peŭnych umovaŭ.
TASS
Kali Kijeŭ usio ž taki vykanaje minskija pahadnieńni, samaabvieščanaja Łuhanskaja narodnaja respublika moža zastacca ŭ składzie Ukrainy, zajaviŭ u intervju ria.ru v.a ministra zamiežnych spraŭ niepryznanaj «ŁNR» Uładzisłaŭ Dejnieha.
«Praktyka pakazvaje, što Ukraina całkam skidvaje z rachunku Danbas. Im patrebna tolki terytoryja. I ŭsia ich dziejnaść, jakaja pavinna pakazvać ich prychilnaść minskim abaviazacielstvam, na spravie pakazvaje prama supraćlehłaje — poŭnaja admova ŭ humanitarnaj śfiery, błakavańnie tych ža abmienaŭ, admova ad vypłat piensij», — acaniŭ łuhanski palityk situacyju.
Jon adznačyŭ, što adkidańnie terytoryi ad dziaržavy viadzie albo da samastojnaha isnavańnia hetaj terytoryi, albo jaje dałučeńnia da inšych subjektaŭ mižnarodnaha prava.
Adnak, pa słovach Dejniehi, «kali Ukraina znojdzie ŭ sabie siły źmianić radykalna, na 180 hradusaŭ, svoj viektar i iści pa šlachu realizacyi Minskich pahadnieńniaŭ, u takich abstavinach mahčymyja varyjanty raźvićcia situacyi pa adnaŭleńni adnosinaŭ».
Pry hetym jon udakładniŭ, što havorka idzie pierš za ŭsio ab damoŭnych adnosinach z Kijevam. «Heta značyć znoŭ-taki havorka idzie ab zdabyćci niekatoraj stupieni samastojnaści ŭ adnosinach ź dziaržavaj, u składzie jakoj my zastajemsia, ale jak samastojny subjekt, jaki ŭklučany ŭ hetuju dziaržavu», — rastłumačyŭ jon.
Jon dadaŭ, što havorka idzie pra fiederatyŭny abo kanfiederatyŭny ład dziaržavy.