U Słucku ŭ futbolnaha kamientatara raźlacielisia na prypynku 400 rubloŭ. Słuččaki sabrali i addali jamu ŭsio da kapiejki
Słuččaki dapamahli futbolnamu kamientataru z Salihorska Jahoru Kaleśniku «złavić» 40 kupiur pa 10 rubloŭ, jakija raźlacielisia ŭ jaho z-za mocnaha vietru. Jahor Kaleśnik raspavioŭ «Kurjeru», jak heta ŭsio zdaryłasia.
U sieradu, 20 červienia, chłopiec jechaŭ maršrutkaj ź Minska ŭ Słuck. Da 13.30 jaho čakali ŭ SFK «Słuck»: jany rychtujuć videa da 20-hodździa futbolnaj kamandy. Kala 12.30 jon vyjšaŭ na prypynku.
«U maršrutcy drenna začyniałasia dźviery, i, kali ja vychodziŭ, kiroŭca paprasiŭ plasnuć joju z usich sił. Adrazu zrabić heta nie moh, tamu što ŭ adnoj ruce trymaŭ zaplečnik, u druhoj — štatyŭ i kašalok. Kali pasprabavaŭ vyzvalić adnu z ruk, niaŭdała za niešta začapiŭsia i vypuściŭ usie hrošy», — raspaviadaje Jahor.
U hety momant da futbolnaha kamientatara padbiehli piać-šeść čałaviek — žančyny i adzin dziadula. Jany «łavili» hrošy, padymali ich z asfaltu i kłali prosta ŭ kašalok Jahoru. Chłopiec byŭ upeŭnieny, što z-za mocnaha vietru niedaličycca niekalkich kupiur. Ale hetaja dumka jaho nie chvalavała, tamu što jon z natchnieńniem naziraŭ, jak ludzi na prypynku «apieratyŭna i skancentravana» dapamahajuć jamu.
«Mnie było nie škada hrošaj. Sam byŭ by vinavaty, kali b nie daličyŭsia 50-100 rubloŭ. Dy i heta stała b majoj płataj za toje, što ja ŭbačyŭ, jakija dobryja ludzi znachodziacca vakoł nas», — kaža Jahor.
Pavodle jaho słoŭ, słuččaki dapamahli sabrać jamu ŭsiu sumu prykładna za 10 siekund. Ni adna z 40 kupiur nie zhubiłasia i «nie palacieła».