Reuters: Jak Biełaruś pieratvaryłasia ŭ bujnoha eksparciora zvadkavanaha hazu
Najbujniejšaje mižnarodnaje ahienctva navin Reuters vypuściła artykuł, u jakim davodzić, što Biełaruś stała nie tolki novaj radzimaj vustryc i kamambieru, ale i pieratvaryłasia ŭ najbujniejšaha eksparciora zvadkavanych vuhlevadarodnych hazaŭ (ZVH) — pieravažna rasijskich.
Reuters miarkuje, što Biełaruś aktyŭna vykarystoŭvaje kanflikt Rasii z Ukrainaj i Zachadam, što dazvalaje joj atrymlivać dadatkovy prybytak. Śćviardžajecca, što ŭ 2018 hodzie Biełaruś istotna pavialičyła impart z Rasii zvadkavanaha hazu i stała jaho hałoŭnym atrymalnikam, chacia jašče ŭ 2017 hodzie Biełaruś zajmała tolki 4-aje miesca pa pastaŭkach ZVH z Rasii, sastupajučy Polščy, Ukrainie i Finlandyi.
Reuters pryvodzić nastupnyja ličby: jašče ŭ 2016 hodzie Biełaruś atrymlivała ad Rasii kala 20 tysiač ton zvadkavanaha hazu ŭ miesiac, a ŭžo ŭ 2018 hodzie — kala 79 tysiač ton za miesiac. Istotnuju častku hetaha hazu Biełaruś reekspartuje ŭ inšyja krainy (pieravažna Ukrainu i Polšču).
Zvadkavany haz, pra jaki idzie havorka, bolš viadomy jak prapan i butan, vykarystoŭvajecca ŭ jakaści aŭtamabilnaha paliva, papularnaha ŭ Polščy i Ukrainie, u kamunalna-bytavym siehmiencie, a taksama ŭ jakaści syraviny dla vytvorčaści palimiernaj pradukcyi.
Cikava, što takaja schiema vyhadnaja i rasijskim vytvorcam — ź jaje dapamohaj nie treba atrymlivać śpiecyjalny dazvoł fiederalnaj słužby na naŭprostavuju pastaŭku hazu va Ukrainu.
«Rasijskija kampanii albo rehistrujuć tut (u Biełarusi) firmu, albo pracujuć praź biełaruskija kampanii, kab takim čynam abychodzić sankcyi. To bok, heta dazvalaje im pastaŭlać (ZVH) va Ukrainu»,
— kaža krynica Reuters.
Pavodle jaje danych, asnoŭny abjom reekspartujemaha hazu prachodzić nibyta praz hazanapaŭnialnyja stancyi kampanii Transekśpiedycyja. U svaju čarhu asnoŭnym rasijskim pastaŭščykom zvadkavanaha hazu źjaŭlajecca nibyta rasijski Sibur.
Reuters śćviardžaje, što dla pastavak u Polšču vykarystoŭvajecca hazaraźmierkavalny chab Vićba, jaki vykarystoŭvaŭsia raniej, a voś dla pastavak zvadkavanaha hazu va Ukrainu daviałosia budavać novyja hazanapaŭnialnyja stancyi, jakija rastuć jak hryby.