Rasija stvaraje «alternatyŭny internet» pa kitajskim uzory
Na toje, što ŭ biahučaj madeli kiravańnia hłabalnaj sietkaj zanadta vialikuju rolu adyhryvajuć ZŠA, rasijskija čynoŭniki skardziacca ŭžo šmat hadoŭ. U sakaviku pra toje, što «usie srodki kiravańnia internetam znachodziacca ŭ rukach Złučanych Štataŭ», u intervju amierykanskamu telekanału NBC zajaviŭ i prezident RF Uładzimir Pucin.
U listapadzie 2017 hodu hazieta RBK sa spasyłkaj na atrymany redakcyjaj pratakoł pasiadžeńnia Savieta biaśpieki RF paviedamiła: hety orhan pad kiraŭnictvam Mikałaja Patrušava daručyŭ Minkomsuviazi i MZS RF zaniacca stvareńniem u krainach BRIKS ułasnaj sistemy karaniovych siervieraŭ DNS.
Heta značyć, pa sutnaści, alternatyŭnaha internetu. Ideja tady była raskrytykavanaja mnohimi ekśpiertami jak niepatrebnaja i zanadta darahaja. Miž tym, pavodle infarmavanych krynic «Kommiersanta», praca praciahvajecca.
Pry hetym rasiejskija ŭłady aktyŭna ŭzajemadziejničajuć z Kitajem. Maskvu vielmi zacikavili idei Fan Bińsina - IT-inžyniera i byłoha rektara Piekinskaha ŭniviersiteta pošty i telekamunikacyj, a ciapier dyrektara i hałoŭnaha inžyniera Centra kiravańnia kamputarnaj sietki i kiravańnia infarmacyjnaj biaśpieki. Jon viadomy jak «baćka kitajskaha fajervoła» za vyrašalny ŭkład u stvareńnie sistemy tatalnaj internet-cenzury ŭ KNR.
Fan Bińsin jeździć pa forumach družalubnych Kitaju krain i prasoŭvaje tam kancepcyju «kibiersuvierenitetu». Na IT-forumie ŭ Chanty-Mansijsku jon zajaviŭ, što alternatyvaj ciapierašniaj sistemie karaniovych DNS-dyrektoryj, jakaja robić ZŠA niezamiennym centram usich kamunikacyj u internecie, źjaŭlajecca sistema «karaniovaha interrutu». Zhodna z hetaj kancepcyi, isnuje mahčymaść stvaryć pramy abmien źviestkami pamiž niekalkimi krainami, kab zapyt karystalnikaŭ da sajtaŭ svajoj krainy i krain, jakija dałučylisia da pahadnieńnia, išła nie praz karaniovyja DNS-sierviery ŭ ZŠA, a naŭprost.
Na praktycy pakul idei Fan Bińsina pryviali da stvareńnia Vialikaha kitajskaha fajervoła - sistemy «Załaty ščyt», jakaja na maj 2018 hoda błakavała 8 tysiač sajtaŭ, paličanych u Kitai «niepažadanymi». U asnoŭnym tudy ŭvachodziać parnahrafija i sajty, praź jakija pašyrajecca palityčna niepažadany dla kitajskich uładaŭ kantent.
Apošniaj achviaraj «Załatoha ščyta» staŭ amierykanski telekanał HBO, viadučy adnoj z humarystyčnych prahram jakoha raspavioŭ, što ŭ Kitai papularnaje paraŭnańnie staršyni KNR Si Czińpina ź Vini-Pucham.
U krainach BRIKS na ideju stvareńnia «alternatyŭnaha internetu» pakul hladziać skieptyčna.