Estonija, Łatvija i Danija stvarajuć šmatnacyjanalnuju Paŭnočnuju dyviziju
U sieradu ministry abarony Estonii, Łatvii i Danii padpisali ŭ jakaści asnoŭnych udzielnikaŭ zajavu ab stvareńni kamandavańnia šmatnacyjanalnaj Paŭnočnaj dyvizii, u jakaści krain-udzielnic zajavu taksama padpisali ministry abarony Kanady, Vialikabrytanii i Litvy, paviedamlaje Radyjo Svaboda sa spasyłkaj na ministerstva abarony Estonii.
«Heta naturalny krok pa ŭmacavańni NATA — skazaŭ ministar abarony Estonii Jury Łujk. — Kali na samicie va Ŭelsie sajuźniki vyrašyli stvaryć štabnyja elementy NATA, a ŭ Varšavie vyrašyli raźmiaścić u Bałtyjskich krainach i Polščy bajavyja hrupy sajuźnikaŭ, to zaraz my zmožam kazać pra cełasny vajskovy štab, sfakusavany na Łatvii i Estonii».
Pamier štabu šmatnacyjanalnaj Paŭnočnaj dyvizii i padraździaleńniaŭ padtrymki składzie kala 300 čałaviek. Štab dyvizii budzie padparadkoŭvacca raźmieščanamu ŭ Ščecinie (Polšča) štabu Paŭnočna-uschodniaha korpusu. Štab prystupić da pracy ŭ vieraśni sioleta i, jak planujecca, dasiahnie poŭnaha aperatyŭnaha patencyjału ŭ siaredzinie 2020 hodu.
U doŭhaterminovyja plany ŭvachodzić udzieł u pracy štabu ŭsich sajuźnikaŭ pa NATA, čyje bajavyja hrupy raźmieščanyja ŭ Bałtyjskich krainach i Polščy.
«Rehijon Bałtyjskaha mora ciapier adzin z samych prystupnych u NATA i važna, kab struktura kamandavańnia aljansu adpaviadała realnym pahrozam, a sajuz NATA byŭ zdolny pry nieabchodnaści kiravać bujnamaštabnymi aperacyjami pa kalektyŭnaj abaronie» — skazaŭ Łujk.
Dyvizija zvyčajna składajecca z 2-4 padraździaleńniaŭ pamieru bryhady i roznych padraździaleńniaŭ padtrymki, nastupny za joj uzrovień kamandavańnia — korpus.