U Hrodnie kuryca pasiabravała z hołubam — i pačała nieści jajki!
Niezvyčajnaje kachańnie hołuba i kurycy bolš za hod naziraje na svaim padvorku 92-hadovy Anatol Michajłavič, piša partał hrodna.life. Niekali spajmany hołub asvoiŭsia ŭ dvary i pasiabravaŭ z kurycaj.
Historyja kachańnia ptušak pačałosia, kali Anatol Michajłavič złaviŭ u dvary svajho pryvatnaha doma biełaha hołuba. Jon nazvaŭsia jaho Kuba i pasadziŭ u kletku ŭ chlavie.
«Spačatku hołub žyŭ u prastornaj kletcy i ja jaho ŭvieś čas karmiŭ, — raspaviadaje Anatol Michajłavič. — Adnojčy ja vyrašyŭ da Kuby padsialić kurycu Mašu, jakaja ŭ mianie nikoli nie niesłasia. Padumaŭ, što joj tam budzie lepš, pierad tym, jak ja jaje zabju».
Hołub Kuba i kuryca Maša žyvuć u dvuchpaviarchovaj kletcy. Štodnia Anatol Michajłavič vypuskaje ich u dvor.
Nie staŭ ekśpierymientavać
Piensijanier niekalki razoŭ vypuskaŭ hołuba z kletki. Praz paru hadzin Kuba prylataŭ nazad i čakaŭ mahčymaści znoŭ patrapić da Mašy.
«Heta dziŭnaje kachańnie, ja nikoli takoha nie bačyŭ. Unučka prapanavała dać kurycy mahčymaść vysiedzieć jajka, ale ja nie staŭ ekśpierymientavać bolš. U historyi takoha jašče nie było, kab hołub dapamahaŭ kurycy apładniacca», — skazaŭ Anatol Michajłavič.
Anatol Michajłavič ź jajkam, jakoje źniesła Maša.
Siensacyi niama
Hrodzienski arnitołah Dźmitryj Vinčeŭski kaža, što hołub naŭrad ci dapamahaje kurycy apładniacca.
«Heta nie narmalna, niejkaja kampiensacyja mocnaja, kali pavodziny z-za adsutnaści adpaviednaj asobiny svajho vidu na inšy vid pieranosiacca. Toje, što nie maje bijałahičnaha sensu, ciažka tłumačyć. Niešta ŭ hołuba pajšło nie tak. Naŭrad ci padobnaje mahčyma ŭ pryrodzie, bo sensu nijakaha nie maje. Kury i inšyja ptuški mohuć adkładvać niezapłodnienyja jajki, tak što tut siensacyi niama. Forma jajka nie kvadratnaja i ničoha asablivaha ŭ hetym taksama niama».
Hołub Kuba i kuryca Maša ŭ chlavie kala kletki.