Vyjšła paštoŭka, pryśviečanaja zmaharam za Biełaruś FOTA
Supracoŭniki «Radyjo Racyja» Alaksiej Trubkin i Arciom Sizincaŭ, stypiendyjat prahramy imia Kastusia Kalinoŭskaha Andrej Cianiuta dy hrafičny dyzajnier Ihar Viensko vydali paštoŭku, pryśviečanuju biełaruskamu antybalšavickamu ruchu 1919—1924 hadoŭ.
Asnovaj paštoŭki, jakaja była vydadziena nakładam u 500 ekzemplaraŭ, stała admysłova zroblenaja kalarovaja viersija viadomaha fotazdymka partyzanaŭ atamana Łukaša Siamienika, jakaja dahetul była ŭ šyrokim dostupie tolki ŭ čorna-biełym kolery i ŭ vielmi drennaj jakaści. Padčas vyrabu paštovak vyjavilisia novyja fakty, datyčnyja fotazdymka. Pieradusim heta miesca (vioska Vialikaje Stachava, što kala Barysava), dzie byŭ zrobleny fotazdymak. Taksama atrymałasia ŭdakładnić datu — 1919, a nie 1920 hod, jaki fihuravaŭ u biełaruskaj histaryčnaj litaratury. Toje ž datyčyć i pravilnaj formy proźvišča atamana Łukaša Siamienika, jakoha pa-roznamu pamyłkova nazyvali jašče ŭ časy dziejnaści jaho partyzanskaha adździeła, pra što śviedčyć artykuł u mienskaj haziecie taho času: «Biełaruskaje žyćcio» № 3 (25) 1920 hod. Łukaš Siamienik — biełaruski vajskoviec, uradženiec vioski Trajanaŭka Chałopienickaj vołaści Barysaŭskaha pavieta. Udzielnik Pieršaj suśvietnaj vajny. Arhanizatar Pieršaha Biełaruskaha partyzanskaha adździeła, jaki paśpiachova dziejničaŭ suprać balšavikoŭ u Barysaŭskim dy Mienskim pavietach u pieršaj pałovie 1919 hoda. Adździeł naličvaŭ kala 50 čałaviek.