Zładziei vynajšli novy sposab, jak kraści hrošy z bankamataŭ, ale ich chutka vykryli
Uviesnu da staličnych pravaachoŭnikaŭ źviarnulisia pradstaŭniki adnaho z bankaŭ: na panelach dvuch bankamataŭ niechta praśvidravaŭ adtuliny, adnak kasiety z kupiurami zastavalisia niekranutymi. Paśla vyśvietliłasia, što heta ślady niaŭdałych sprobaŭ kradziažu hrošaj, paviedamlaje pres-słužba MUS.
— Kab zavałodać najaŭnaściu, złamyśniki sprabavali vykarystoŭvać śpiecyjalizavanaje prahramnaje zabieśpiačeńnie. Kab jaho zapuścić, nieabchodna było padłučycca da elektronnych sistemaŭ pryłady vydačy hrošaj, papiarednie paškodziŭšy korpus bankamata, — rastłumačyŭ namieśnik načalnika ŭpraŭleńnia pa raskryćci złačynstvaŭ u śfiery vysokich technałohij MUS Kirył Viatkin.
Nielehalny soft pradavaŭsia na zakrytych internet-placoŭkach. Kab pierakanać patencyjnych pakupnikoŭ u pracazdolnaści prahramnaha zabieśpiačeńnia, jaho stvaralniki apublikavali videarolik, u jakim pakrokava raśpisali ździajśnieńnie złačynstva. Pradaŭcy zapeŭnivali, što ich mietad dazvalaje całkam spustošyć bankamat.
Apieratyŭniki ŭpraŭleńnia «K» MUS vyjšli na čaćviarych padazravanych, žycharoŭ Minska, jakija za niekalki tysiač dalaraŭ nabyli prahramu i pasprabavali joju skarystacca, adnak davieści spravu da kanca nie zmahli.
U pačatku lipienia fihurantaŭ zatrymali. U dačynieńni da ich USK pa h. Minsku raspačata kryminalnaja sprava pa art.14 i č.4 st.212 KK RB («Zamach na kradziež šlacham vykarystańnia kampjutarnaj techniki ŭ asabliva bujnym pamiery») i pa č.1 art.218 KK RB («Naŭmysnaje paškodžańnie majomaści»). Usie padazravanyja aryštavanyja. Śledstva praciahvajecca.