Pravaabaroncy zaklikajuć spynić kryminalnuju spravu ŭ dačynieńni da kiraŭnika BiełaPAN
Biełaruskija pravaabaroncy vystupili z zajavaj u suviazi z kryminalnym pieraśledam kiraŭnika infarmacyjnaha ahienctva «BiełaPAN» Alesia Lipaja i ciskam na žurnalistaŭ u Biełarusi.
12 lipienia prajšoŭ miesiac z momantu zaviadzieńnia kryminalnaj spravy ŭ dačynieńni da kiraŭnika viadučaha niezaležnaha infarmacyjnaha ahienctva «BiełaPAN» Alaksandra Lipaja. Sprava zaviedziena Upraŭleńniem Departamienta finansavych rasśledavańniaŭ Kamiteta dziaržaŭnaha kantrolu pa Minsku i Minskaj vobłaści pa fakcie naŭmysnaha ŭchileńnia ad vypłaty padachodnaha padatku ŭ asabliva bujnym pamiery za 2016-2017 hady. (č. 2 art 243 Kryminalnaha kodeksa Respubliki Biełaruś).
Abstaviny kryminalnaj spravy dazvalajuć kazać pra jaje palityčnuju padaploku i stavić jaje ŭ adzin šerah z asudžeńniem u 2011 h. pa tym ža artykule KK kiraŭnika pravaabarončaha centra «Viasna» Alesia Bialackaha i kryminalnym pieraśledam kiraŭnikoŭ niezaležnaha «Biełaruskaha prafsajuza rabotnikaŭ radyjoelektronnaj pramysłovaści» Hienadzia Fiadyniča i Ihara Komlika, sprava pa abvinavačvańni jakich užo nakiravanaja ŭ sud.
Tak, kryminalnaja sprava ŭ dačynieńni da Alesia Lipaja była raspačata 12 červienia 2018 h. u 16 hadzin. Miž tym, jašče za tydzień da hetaha, 5 červienia, A.I.Lipaj padaŭ padatkovyja dekłaracyi za 2016-2017 hady. U toj ža dzień inśpiekcyja Ministerstva pa padatkach i zborach pa Partyzanskim r-nie h. Minska nakłała na jaho administracyjnaje spahnańnie za niesvoječasovaje pradstaŭleńnie padatkovych dekłaracyj i zrabiła raźlik sumy padatkaŭ i pieni, jakija byli vypłačanyja Lipajem ŭ poŭnym abjomie 12 červienia ŭ 13-40.
Takim čynam, da momantu zaviadzieńnia kryminalnaj spravy ab naŭmysnym uchileńni ad vypłaty padatkaŭ A. Lipaj nie tolki zadekłaravaŭ dachody, ale i całkam spłaciŭ ŭsiu sumu naličanych padatkaŭ i pieni. Niahledziačy na heta, sprava była ŭzbudžanaja, praz dva dni pa miescy žycharstva A. Lipaja byŭ zrobleny vobysk i nakładzieny aryšt na jaho majomaść, a 26 červienia vyniesiena pastanova ab prymianieńni ŭ dačynieńni da jaho pracesualnaha prymusu ŭ vyhladzie abmiežavańnia na vyjezd ź Biełarusi.
Hetyja dziejańni my źviazvajem z ahulnaj tendencyjaj uzmacnieńnia cisku na niedziaržaŭnyja ŚMI i internet-resursy ŭ Biełarusi (u tym liku ŭniasieńnie źmianieńniaŭ u zakanadaŭstva ab ŚMI).
U zajavie, adznačajecca, što adnym z ryčahoŭ cisku na niezaležnyja miedyja źjaŭlajecca ich ekanamičnaja dyskryminacyja. Jana prajaŭlajecca, u pryvatnaści, u faktyčnaj zabaronie zamiežnych inviestycyj u ŚMI, z adnaho boku, i ŭ štohadovym biudžetnym finansavańni dziaržaŭnych ŚMI ŭ pamiery kala 50 młn. jeŭra, z druhoha. Dziaržaŭnyja ŚMI majuć i inšyja niekankurentnych pieravahi (prymusovaja padpiska nasielnictva na drukavanyja vydańni, uklučeńnie telekanałaŭ u «ahulnaabaviazkovy» pakiet, rekłamnyja prefierencyi i da t.p.). Da finansavych mieraŭ cisku na niezaležnuju žurnalistyku my adnosim i štrafy žurnalistam-fryłansieram za supracoŭnictva z zamiežnymi ŚMI biez akredytacyi (pa advolna traktujemaj milicyjaj i sudami častcy 2 art. 22.9 Kodeksa ab administracyjnych pravaparušeńniach, jaki praduhledžvaje pakarańnie za parušeńnie paradku vyrabu i (abo) raspaŭsiudžvańnia pradukcyi ŚMI). Žurnalistaŭ štrafujuć nie za źmiest ich materyjałaŭ, a za sam fakt ich źjaŭleńnia ŭ zamiežnych miedyja.
Minuły hod staŭ rekordnym pa kolkaści sudovych štrafaŭ pa hetym artykule KaAP i ich ahulnaj sumie: 69 štrafaŭ na sumu, ekvivalentnuju amal 53 tys. jeŭra (heta bolš, čym za try papiarednija hady, razam uziatych). Adnak u hetym hodzie situacyja tolki pahoršyłasia, i kolkaść štrafaŭ pa č. 2 art. 22.9 ŭžo nabližajecca da 60, a suma - da ekvivalentu 50 tys. jeŭra. I heta adbyvajecca ŭ situacyi, kali pytańnie pra pieraśled žurnalistaŭ-fryłansieraŭ, materyjały jakich źjaŭlajucca ŭ zamiežnych ŚMI, užo niekalki hadoŭ abmiarkoŭvajecca ŭ ramkach Dyjałohu ab pravach čałavieka pamiž Jeŭrapiejskim Sajuzam i Respublikaj Biełaruś.
U spravie Alaksandra Lipaja my taksama bačym sproby niekatorych struktur vykarystoŭvać finansavaje zakanadaŭstva dla taho, kab pieraškodzić pracy niezaležnych ŚMI.
U suviazi z vykładzienym:
- ličym kryminalny pieraśled kiraŭnika infarmacyjnaha ahienctva «BiełaPAN» Alaksandra Lipaja źviazanym ź jaho prafiesijnaj dziejnaściu, što źjaŭlajecca sprobaj pieraškodzić pracy infarmacyjnaha ahienctva «BiełaPAN» - adnaho z samych aŭtarytetnych siarod niezaležnych krynic dakładnaj i apieratyŭnaj infarmacyi pra Biełaruś;
- zaklikajem spynić kryminalnuju spravu ŭ dačynieńni da A.I. Lipaja;
- zaklikajem vykonvać pałažeńni artykuła 19 Mižnarodnaha Pakta ab hramadzianskich i palityčnych pravach pry ustalavańni abmiežavańniaŭ na svabodu vykazvańnia mierkavańnia i spynić pieraśled žurnalistaŭ-fryłansieraŭ za ažyćciaŭleńnie imi svajoj prafiesijnaj dziejnaści, jakija nie parušajuć miežy hetaj svabody.
Zvarot padpisali:
— HA «Biełaruskaja asacyjacyja žurnalistaŭ»
— Pravaabarončy centr «Viasna»
— Ekśpiertna-pravavoje tavarystva «Inicyjatyva FORB»
— RHA «Pravavaja inicyjatyva»
— RPHA «Biełaruski Chielsinkski Kamitet»
— aśvietnickaja ŭstanova «Centr pravavoj transfarmacyi»
— Inicyjatyŭnaja hrupa «Identyčnaść i prava»
— Asambleja NDA
— Biełaruski dakumientacyjny centr
— Biełaruski Dom pravoŭ čałavieka
— Ustanova «Kansultacyjny centr pa aktualnych mižnarodnych praktykach i ich implemientacyi ŭ pravie «Chjuman Kanstanta»
— Aśvietnicka-dabračynnaja ŭstanova «Kamitet «Salidarnaść»