Ukraina zajaviła pra namier Suśvietnaha patryjarcha dać aŭtakiefaliju Kijevu
president.gov.ua
Delehacyja Suśvietnaha patryjarchata, jakaja prybyła ŭ Kijeŭ dla ŭdziełu ŭ śviatkavańni Chryščeńnia Rusi, na sustrečy z prezidentam Piatrom Parašenkam abviaściła pasłańnie Suśvietnaha patryjarcha Varfałamieja. Paviedamleńnie pra sustreču apublikavana na sajcie prezidenta Ukrainy. U cytacie z pasłańnia havorycca, što «kančatkovaja meta» Kanstancinopala — heta «daravać ukrainskaj carkvie aŭtakiefaliju».
Pasłańnie začytaŭ Jepiskap Edmancki Ukrainskaj pravasłaŭnaj carkvy ŭ Kanadzie Iłaryjon.
«Pryznajučy vysokuju adkaznaść pieršaprastolnaj Kanstancinopalskaj Carkvy, jakaja nikoli nie pierastavała i nie miryłasia pierad niezakonnymi i niekananičnymi situacyjami, jakija ŭzrušvali naturalnaje funkcyjanavańnie pravasłaŭnaj carkvy, i ŭ hetyja adkaznyja časy jana ŭziała na siabie inicyjatyvu adnavić adzinstva pravasłaŭnych viernikaŭ Ukrainy z kančatkovaj metaj daravać ukrainskaj carkvie aŭtakiefaliju».
Va Ukrainskaj pravasłaŭnaj carkvie Maskoŭskaha patryjarchata zajavili, što ŭ zajavie Varfałamieja, jakaja pryviedziena na sajcie prezidenta Ukrainy, niama ničoha niezvyčajnaha.
«Prasłuchaŭšy tekst pasłańnia, mahu skazać, što ničoha niezvyčajnaha, ekstraardynarnaha, takoha, čaho raniej my nie čuli, skazana Patryjarcham Varfałamiejem tam nie było (kali ja pravilna pačuŭ, mahčyma, ja pamylajusia) <…> Suśvietny patryjarchat spadziajecca na adnaŭleńnie kananičnaha adzinstva pravasłaŭnych va Ukrainie. My molimsia, kab błasłaviony narod udastoiŭsia znoŭ adnaho i adzinaha carkoŭnaha kiraŭnictva, adnaŭleńnia kananičnaści, vylačeńnie raskołaŭ. Tak heta ŭsio toje ž samaje, što havorym my», — pryvodzić TASS zajavu namieśnika staršyni adździeła źniešnich carkoŭnych suviaziaŭ UPC MP protaijereja Mikałaja Danileviča.
U toj ža čas u zajavie Suśvietnaha patryjarchata, jakaja była apublikavana ŭ lipieni, havaryłasia pra hatoŭnaść vyrašyć carkoŭnuju prablemu va Ukrainie, «kirujučysia tym, što vyhadna dla naroda Božaha i zachavańnia ŭsiepravasłaŭnaha adzinstva». U joj cytavalisia słovy Varfałamieja ab «žadańni adnavić adzinstva padzielenaha carkoŭnaha cieła va Ukrainie».
«Nie budziem zabyvać, što Kanstancinopal nikoli i nikomu nie sastupaŭ terytoryju Ukrainy z dapamohaj jakoha-niebudź carkoŭnaha aktu, a tolki daŭ patryjarchu Maskoŭskamu prava paśviačeńnia abo pieradačy mitrapalita Kijeŭskaha pry ŭmovie, što mitrapalit Kijeŭski pavinien być abrany duchoŭna-miranskich źjezdam i paminać Suśvietnaha patryjarcha», — pracytavała pres-słužba słovy Varfałamieja.
Piatro Parašenka ŭčora zajaviŭ, što ŭkrainskaja ŭłada nie budzie ŭmiešvacca va ŭnutranyja spravy pravasłaŭnaj carkvy, ale i nie dazvolić hetaha rabić inšym. Pra heta jon zajaviŭ padčas vystupu da 1030-j hadaviny Chryščeńnia Rusi.
«Ułada nie budzie ŭmiešvacca va ŭnutranyja carkoŭnyja spravy. Adnak i inšym nie dazvolić hetaha rabić. Dla taho i liču vielmi nieabchodnym absiekčy ŭsie ščupalcy, jakimi ŭnutry našaha dziaržaŭnaha arhanizma varočaje kraina-ahresar», — padkreśliŭ Parašenka.
«Hetaja situacyja — pahroza nacyjanalnaj biaśpiecy Ukrainy, što prosta abaviazvaje nas dziejničać. Aŭtakiefalija — heta pytańnie našaj niezaležnaści. Heta — pytańnie našaj nacyjanalnaj biaśpieki. Heta — pytańni suśvietnaj hieapalityki», — dadaŭ Parašenka.