U Hrecyi — najbolšyja za sto hod u Jeŭropie lasnyja pažary: zahinuŭ 91 čałaviek
Pažary na ŭźbiarežžy na zachad ad Afinaŭ stali samymi śmiertanosnymi ŭ Jeŭropie za bolš jak sto hod. Što stała pryčynaj takich pažaraŭ, pakul dakładna nieviadoma.
Lasnyja pažary ŭ Hrecyi zabrali žyćci 91 čałavieka pa stanie na niadzielu, piša radyjo «Svaboda» sa spasyłkaj na Associated Press. Jašče 25 čałaviek źnikli bieź viestak.
Pieravažnaja bolšaść achviaraŭ pamierła niepasredna ŭ ahni, choć častka ludziej patanuła ŭ mory padčas uciokaŭ ad połymia.
Pažary pačalisia jašče 23 lipienia. Choć baraćbie z ahniom zaminajuć śpioka i mocnyja paryvy vietru, ciapier usie pažary, što pahražali žyłym masivam, zhašanyja.
Ułady Hrecyi źviartalisia pa mižnarodnuju dapamohu, na jakuju adhuknuŭsia šerah jeŭrapiejskich krainaŭ. U baraćbie z ahniom brali ŭdzieł nie tolki hreki, a i ratavalniki ź Ispanii, Italii, Kipru i Rumynii. Alaksandar Łukašenka ad imia biełaruskaha narodu vykazaŭ hrekam spačuvańnie.
Premjer-ministar Hrecyi Aleksis Cypras uziaŭ na siabie adkaznaść za trahiedyju, zajaviŭšy, što ŭrad nie zdoleŭ abaranić žyćci ludziej. Aficyjnaja pryčyna pažaraŭ pakul nie nazyvajecca.