Devalvacyja?
U stalicy chodziać čutki, što Nacbank maje namier abiascenić biełaruski rubiel. Svaje valuty ŭžo devalvavali na 20% Ukraina, Isłandyja, Vuhorščyna — krainy, jak akazałasia, z samymi chistkimi finansavymi systemami.
U stalicy chodziać čutki, što Nacbank maje namier razava abiascenić biełaruski rubiel.U staličnych bankach pahavorvajuć, što dalejšaje ŭtrymańnie kursu robicca niemetazhodnym.
U pres‑słužbie Nacbanku hetuju infarmacyju nie paćvierdzili: «Nijakaha abvału nia budzie. Heta ni čym nie padmacavanyja čutki. Sytuacyja nie vychodzić za ramki prahnoznych pakazčykaŭ.
Devalvacyja rubla ŭ niaznačnych pamierach adbyvajecca štodnia, ale pra surjozny pamier havorka nie viadziecca».
Pahałoska pra devalvacyju siłkujucca infarmacyjaj pra vyniki tarhoŭ na Biełaruskaj valutna-fondavaj biržy. Hetak, 4 listapada popyt na dalary skłaŭ 71 młn. 234 tys., prapanova - 6 młn. 343 tys. Heta značyć, na takuju sumu za adzin dzień źmienšylisia rezervy Nacbanku.
Popyt na valutu jak z boku subjektaŭ haspadarańnia, tak i z boku nasielnictva, zadavalniajecca za košt zołatavalutnaha rezervu (ZVR). Pavodle staršyni Nacbanku Piatra Prakapoviča,
składanaści na valutnym rynku ŭźnikli ad taho, što zamiežnyja pakupniki pačali zatrymlivacca z raźlikam ź biełaruskimi vytvorcami.Ź jahonych słovaŭ, papoŭnić rezervy dapamoža rasiejski kredyt. Dyj MVF dapamohu paabiacaŭ. Akramia taho, papoŭnić rezervy planujecca za košt prodažu kantrolnych pakietaŭ bujnych «Biełprambudbanku» i «Bielinvestbanku».
Što datyčyć šarahovych hramadzianaŭ, to im staršynia Nacbanku nia raić śpiašacca nabyvać valutu. «Lepiej pracavać ź biełaruskim rublom», — aptymistyčna zajaviŭ hałoŭny bankir.
Prakapovič supakoiŭ — prahnozy pra kurs nacyjanalnaj valuty da dalara ZŠA nia źmieniacca, na kaniec hetaha hodu jon budzie znachodzicca ŭ dyjapazonie 2.100 — 2.200 rubloŭ za 1$.
Vice-premjer rasiejskaha ŭradu Alaksiej Kudryn sprahnazavaŭ, što pik kryzisu pryjdziecca na viasnu nastupnaha hodu. Praŭda, suśvietnaja haspadarka i finansavaja systema funkcyjanujuć na siońnia niepradkazalna, nasupierak raniejšym zakonam, jakija zdavalisia žaleznymi. Dakładna pradkazać budučyniu siońnia nie biarucca navat futurolahi.
Siarednieterminovyja prahnozy raźvićcia biełaruskaj haspadarki samyja roznyja.Alaksandar Łukašenka zabaraniŭ užyvańnie słova «kryzis» — jaho niama i niama čaho paniku siejać. U toj ža čas jość i ekanamisty-pesymisty. Na kruhłym stale ekspertaŭ, arhanizavanym 5 listapada Partyjaj BNF, havaryli pra rost deficytu zamiežnahandlovaha balansu ŭ nastupnym hodzie da 6 młrd dalaraŭ, padzieńnie vytvorčaści ŭ metalurhii, aŭtapramie i charčovaj pramysłovaści, i devalvacyju rubla da 50%.
Svaje valuty ŭžo devalvavali na 20% Ukraina, Isłandyja, Vuhorščyna — krainy, jak akazałasia, z samymi chistkimi finansavymi systemami. Pa ŭkrainskaj ekanomicy ŭdaryła padzieńnie popytu na metał — asnoŭny artykuł ukrainskaha ekspartu. Isłandzkuju kronu pavaliŭ bankaŭski krach, a madziary paprostu daŭno žyli nie pa srodkach. U toj ža čas pakul stabilna trymajucca Polšča, Litva, Łatvija, a taksama Rasija ź jaje značnymi zołatavalutnymi rezervami.
Možna mierkavać, što
stabilnaść biełaruskaha rubla zaležyć ad vyniku pieramovaŭ z MVF,u jakoha biełaruskaje kiraŭnictva paprasiła 2 miljardy dalaraŭ. Pieršaja reakcyja Fondu była pazytyŭnaj, ale nijakija drabnicy nie ahałošvajucca.
Kaliści Łukašenka nazvaŭ MVF «bandaj machlaroŭ», kpić z hetaj nahody niamieckaja hazeta «Frankfurter alhiemajne cajtunh», a ciapier prosić łaski. I heta pry tym, što naftahazavaja datacyja ad Maskvy dasiahnuła rekordnych pamieraŭ — Biełaruś kuplaje haz za 129 dalaraŭ, tady jak astatniaja Eŭropa — za 460—520.
Varta adznačyć, što kali ŭłady i pojduć na źniaceńvańnie rubla, to rašeńnie budzie prymać nie Nacbank, a asabista Łukašenka.