Vyniki akcyi «Dapamahčy Baradulinu»: bolš za 400 zvarotaŭ
Z Horadni - 30 čałaviek, z Baranavičaŭ - 15, ź Vilni - 6, jość achvotniki navat ź Italii
Fota - Julija Daraškievič
Akcyja ŭ padtrymku Ryhora Baradulina, jaki čarhovy raz trapiŭ u balnicu, maje plon: na zaklik dapamahčy narodnamu paetu adhuknułasia 400 achviaradaŭcaŭ. I ludzi praciahvajuć źviartacca.
Voś što kaža Hleb Łabadzienka, arhanizatar akcyi: «Aktyŭny etap badaj skončyŭsia. Ciapier źviartajucca mienš — ad 5 da 10 achvočych dapamahčy štodnia. Ludzi zvoniać adusiul i pomač idzie adusiul. Jość i svojeasablivyja rekordy. U Harodni žurnalist Vitaŭt Rudnik sabraŭ ažno 30 zajavak. Juraś Stupakoŭ z Baranavičaŭ — 15. Z apošnich achvotnikaŭ: Lavon Volski ź siamjoj. Da taho ž achviaravańni prychodziać z-za miažy. Ź Vilni my atrymali 6 zvarotaŭ, z Prahi — 5. I kažuć, što buduć dapamahać jašče. Napisali navat ź Italii: karennaja italjanka, jakaja vučyłasia na słavianskim adździaleńni, pačuŭšy pra paeta, prapanavała svaju pomač chutčej na doŭhuju perspektyvu — ŭ vydańni baradulinskich knih pa-italjansku».
Za svaju dabračynnaść usie achvotniki atrymlivajuć knihi z darčym podpisam Baradulina. Andrej Chadanovič, jaki pryjšoŭ, kab achviaravać i atrymać svoj asobnik, ubačyŭ, što ruk u arhanizataraŭ akcyi jaŭna nie chapaje, i tamu zastaŭsia razhružać knihi. Andrej kaža, što akramia dasiahnieńnia vysakarodnaj mety padtrymać dziadźku Ryhora, u dadatak majem vydatnuju akcyju pa papularyzacyi biełaruskaj paezii. Hleb Łabadzienka dadaje, što mienavita asoba Baradulina, jaho tvorčaść, tak uźniała ludziej dapamahčy. «Kaniešnie, kali b chto inšy trapiŭ u padobnuju sytuacyju, dyk ludzi taksama b dapamahli, ale hetaje bahaćcie vodhukaŭ śviedčyć, što ludzi reahujuć mienavita na postać dziadźki Ryhora i hetak vyražajuć jamu svaju ŭdziačnaść za vieršy».
Sam Baradulin pačuvajecca zbolšaha lepiej, ale jaho jašče kolki dzion buduć trymać u balnicy. Pavodle Łabadzienki, dziadźka Ryhor «chiba trochi zasmučany hetakaj šumichaj vakoł svajoj asoby». Nahadajem, što z prapanovami dapamahčy možna źviartacca na elektronny adras: labadzenka@gmail.com