Iłan Mask raspavioŭ pra stomlenaść i prablemy sa zdaroŭjem
Zasnavalnik SpaceX i Tesla Iłan Mask u intervju The New York Times raspavioŭ, što vymušany pravodzić na pracy pa 120 hadzin na tydzień i nie adryvacca ad kiravańnia kampanii sutkami. Miljarder pryznaŭsia, što padobny režym vyklikaje ŭ jaho prablemy sa snom i praźmiernuju stomlenaść, a blizkija zakłapočanyja stanam jaho zdaroŭja.
Pa słovach Maska, minuły hod staŭ dla jaho «samym ciažkim i balučym» za ŭsiu jaho karjeru. «Jon byŭ pakutlivym», - dadaŭ jon. Miljarder raspavioŭ, što svoj dzień naradžeńnia 28 červienia, hetak ža jak i noč paśla jaho, jon całkam pravioŭ u ofisie Tesla. Sioleta jamu spoŭniłasia 47 hadoŭ. Praź niekalki dzion jon ledź paśpieŭ na viasielle svajho brata ŭ Katałonii, kudy prybyŭ za dźvie hadziny da cyrymonii prosta z zavoda kampanii. Adrazu ž paśla viasiella jon znoŭ sieŭ u samalot i viarnuŭsia ŭ štab-kvateru Tesla.
«Byli časy, kali ja nie pakidaŭ zavod na praciahu troch ci čatyroch dzion, nie vychodziačy ŭvieś hety čas na vulicu. Usio heta adbyvałasia za košt času, jaki ja moh by patracić na dziaciej i sustrečy ź siabrami», — dadaŭ pradprymalnik.
Adkazvajučy na pytańnie, jak heta adbiłasia na jaho zdaroŭi, Mask pryznaŭ, što padobny hrafik ciahnie za saboj prablemy. «Nasamreč usio heta nie vielmi dobra. U mianie jość siabry, jakija sapraŭdy byli hetym zakłapočanyja», — skazaŭ jon.
Pa słovach Maska, jon maje prablemy sa snom i vymušany prymać snatvornaje. «Vielmi časta ja sutykajusia z vybaram — nie spać naohuł ci prymać snatvornaje», — zaŭvažyŭ jon.