«Časam hladzić na hory i płača»: svajaki Michaela Šumachiera raspaviali pra jaho stan
Ciamirazovy čempijon «Formuły-1» Michael Šumachier, paralizavany ŭ vyniku atrymanaj traŭmy pry spusku na hornych łyžach u 2013 hodzie, znoŭ moža vykazvać emocyi. Pra heta zajavili svajaki spartsmiena vydańniu Paris Match.
«Kali my sadžajem jaho ŭ invalidny vazok i vyvozim u miesca, dzie adkryvajecca cudoŭnaja panarama hor i vid na voziera, Michael časam płača», — adznačyli jaho blizkija.
Pa słovach svajakoŭ, heta hałoŭnaje dasiahnieńnie spartsmiena ŭ kursie reabilitacyi na dadzieny momant. Štodnia Šumachier prachodzić fizijaterapieŭtyčnaje lačeńnie, i śpiecyjalisty nazirajuć nievialiki prahres. Tak, u basiejnie jon moža zrabić niekalki ruchaŭ.
Były spartsmien nie moža chadzić, samastojna stajać i razmaŭlać.
Akramia taho, nazirajucca prablemy z pamiaćciu. Kab jaje stymulavać, śpiecyjalisty vykarystoŭvajuć znajomyja Šumachieru huki ruchavikoŭ mašyn, prymušajučy jaho pavaročvać rul, raspaviali svajaki.
Pa dadzienych vydańnia, siamja honščyka pryniała rašeńnie pieravieźci jaho sa Šviejcaryi na ispanski vostraŭ Majorka.
Šumachier atrymaŭ traŭmy ŭ śniežni 2013 hoda, katajučysia na hornych łyžach. Honščyk byŭ špitalizavany, daktary ŭviali jaho ŭ stan štučnaj komy, jakaja doŭžyłasia bolš za paŭhoda. Ź vieraśnia 2014 hoda jon znachodzicca sa svajoj siamjoj na reabilitacyi ŭ Šviejcaryi.