Łukašenka raspavioŭ, jak vybiraŭ pamiž Jermałovičam i Amarynym
Uładzimir Amaryn.
Zakranajučy siońnia pytańnie pryznačeńnia novaha ministra finansaŭ, Alaksandr Łukašenka zaŭvažyŭ, što papiaredni kiraŭnik viedamstva Uładzimir Amaryn źjaŭlajecca dobrym śpiecyjalistam.
«My vinavatyja sami, što, nie razabraŭšysia, kinuli jaho ŭ hetaje piekła, uličvajučy jaho asobnyja rysy charaktaru. Jon zanadta spakojny čałaviek dla hetaj pasady, ale jon dobry śpiecyjalist. I jon nie moža prapaści. Ni ŭ jakim razie nielha zahubić takoha śpiecyjalista», — padkreśliŭ kiraŭnik dziaržavy.
Pavodle jaho słoŭ, Maksim Jermałovič taksama nie vypadkovy čałaviek u Ministerstvie finansaŭ. U svoj čas jon razam z Uładzimiram Amarynym pretendavaŭ na pasadu ministra.
Maksim Jermałovič.
«Dla mianie vy byli praktyčna roŭnavialikija, ja navat pierš addavaŭ pieravahu tvajoj kandydatury. Ale zanadta šmat było tych, chto rekamiendavaŭ i vystupaŭ za Amaryna. I da hetaha, darečy, treba viarnucca — kab adkazvali za svaje rekamiendacyi. Ale, uličvajučy, što ja mienš viedaŭ, čym tyja, chto rekamiendavali i Amaryna, i Jermałoviča, ja pahadziŭsia pryznačyć na pasadu Amaryna. Kali ŭžo ščyra kazać, jak heta było. Ale dla siabie ja zrabiŭ vysnovu: kali čałaviek dobry finansist, daśviedčany rabotnik, jaki viedaje zamiežnyja movy, jaki razmaŭlaje ŭ śviecie na adnoj i toj ža movie ź finansistami, ja vyrašyŭ pahladzieć, źniknie ci nie. Nie źnik. Pryjšoŭ čas — vyrašajem pytańnie ab pryznačeńni», — kanstatavaŭ Alaksandr Łukašenka.