Kandydat ad KPRF pieramahaŭ na vybarach u Prymorji paśla padliku 95% hałasoŭ z roźnicaj 5%. A ŭ vyniku prajhraŭ
16 vieraśnia ŭ Prymorji adbyŭsia druhi tur hubiernatarskich vybaraŭ. Na ich upeŭniena lidziravaŭ kandydat ad KPRF Andrej Iščanka — paśla apracoŭki 95% pratakołaŭ z vybarčych učastkaŭ jon nabiraŭ 51,6%, a jaho supiernik ad «Adzinaj Rasii» Andrej Tarasienka — 45,8%.
Paśla hetaha razryŭ staŭ rezka skaračacca, pryčym paśla apracoŭki 97,87% pratakołaŭ anłajn-tabło ŭ CVK nie abnaŭlałasia kala hadziny. Za hety pramiežak — z 98,77% da 99,03% apracavanych pratakołaŭ — kolkaść hałasoŭ za Iščanku skaraciłasia na 5, a za Tarasienku — pavialičyłasia na 13,5 tysiač, i adzinaros vyrvaŭsia napierad. Kali było apracavana 99,1% — jon staŭ niedasiahalny.
U padlik hałasoŭ umiašalisia palicyja i MNS
U pryvatnaści, da budynka, dzie raźmiaščajecca vybarčaja kamisija Savieckaha rajona Uładzivastoka, prybyŭ pažarny raźlik, a la ŭvachodu ŭ budynak stali supracoŭniki MNS.
Pa słovach pradstaŭnikoŭ KPRF, dadzieny TVK zaciahvaŭ z abviaščeńniem vynikaŭ hałasavańnia ŭ rajonie, bo jaho supracoŭniki pierapisvajuć pratakoły. A kali naziralniki ad kamunistaŭ admovilisia pakinuć budynak, na miesca prybyli pažarnyja, zajaviŭšy, što im pastupiŭ sihnał ab uzharańni na trecim paviersie i nieabchodna pačać evakuacyju.
Padobnaja situacyja skłałasia i ŭ inšych haradach. Paviedamlajecca, što budynak TVK Usuryjskaj haradskoj akruhi ačepleny supracoŭnikami palicyi. Tudy sprabavali trapić deputat Zakanadaŭčaha schodu Anatol Dałhačoŭ i deputat Dziarždumy Juryj Afonin, ale im adkazali, što heta niemahčyma, bo «złamany zamok».
Naziralniki ad KPRF abviaścili haładoŭku ŭ budynku TVK Arcioma, bo im admovilisia vydać vynikovy pratakoł kamisii. Pra heta paviedamili ŭ maskoŭskim štabie KPRF.
Daviedaŭšysia pra źmianieńnie situacyi, Iščanka napisaŭ u «Fejsbuku», što taksama abviaščaje haładoŭku.
«Mahija ličbaŭ mnie praročyć pravał z adryvam mienš za pracent. Siabry, u nas z vami kraduć hałasy, abaronim našuju pieramohu zaraz! Ja abviaščaju biesterminovuju zabastoŭku padmanutych vybarščykaŭ», — piša kandydat u hubiernatary ad KPRF