Žychar Homielskaha rajona vyjšaŭ z kałonii, skraŭ aŭto i atrymaŭ try miesiacy aryštu. Prakuratura padała pratest
Vyzvaliŭšysia ź miescaŭ pazbaŭleńnia voli, 25-hadovy uradženiec vioski Ramanavičy Homielskaha rajona pryjechaŭ u Homiel, dzie napačatku jon adznačyŭ viartańnie na radzimu.
Pjany mužčyna vyrašyŭ vykraści aŭto, razabrać na zapčastki i zarabić hrošy. Chłopiec zaprykmieciŭ «Piežo». Kamieniem raźbiŭ škło, zavioŭ mašynu i źjechaŭ. A kab schavać, što technika skradzienaja, spyniŭsia la voziera i vykinuŭ na abočynu numary. Znoŭ zavieści transpart nie zmoh — dapamoh nieznajomiec, jaki jechaŭ pobač. Kiroŭcu, jaki byŭ pjany i biez dakumientaŭ, zatrymali. Sud Centralnaha rajona Homiela pryznaŭ jaho vinavatym u vykradańni majomaści, ździejśnienym paŭtorna, i prysudziŭ da troch miesiacaŭ aryštu.
Prakuratura Homiela apratestavała rašeńnie suda. U svaje niapoŭnyja 26 hadoŭ chłopiec nieadnarazova sudzimy: za vykradańnie, uchileńnie ad pakarańnia, nievykanańnie patrabavańniaŭ previentyŭnaha nahladu i trojčy za kradziež.
Jak raspavioŭ načalnik adździeła prakuratury vobłaści Dzianis Mikušaŭ, sudovaja kalehija pa kryminalnych spravach Homielskaha abłasnoha suda pahadziłasia z dovadami prakuratury i zadavoliła apielacyjny pratest, pryznačyŭšy abvinavačanamu pakarańnie, jakoje zaprasiła prakuratura Homiela, — pazbaŭleńnie voli terminam na dva hady z adbyvańniem u papraŭčaj kałonii strohaha režymu.