Piać faktaŭ pra piać pryznačencaŭ Łukašenki
Alaksandr Łukašenka zładziŭ kadravy aŭtorak. Źjaviŭsia novyja namieśniki staršyń Minskaha i Bresckaha abłvykankamaŭ, pamočnik prezidenta pa Viciebskaj vobłaści, namieśnik staršyni KDK, pasły, a taksama staršyni rajvykankamaŭ. Što heta za ludzi, raskazvajem u hetym materyjale.
Były staršynia kałhasa imia Suvorava
Ivanu Markieviču 52 hady, jon rodam ź vioski Miakišy Ščučynskaha rajona. Pa adukacyi jon ahranom, skončyŭ Hrodzienski sielskahaspadarčy ŭniviersitet. Paśla los panasiŭ Ivana Stanisłavaviča pa roznych kałhasach krainy: papracavaŭ i ŭ Hrodzienskim rajonie, i ŭ Šumilinskim, i ŭ Vałožynskim. U apošnim uznačalvaŭ kałhas imia Suvorava.
Admietna, što Markievič vučyŭsia nie ŭ biełaruskaj Akademii kiravańnia, a ŭ rasijskaj. Byŭ namieśnikam staršyni Vałožynskaha rajvykankama pa sielskaj haspadarcy i charčavańni. Adtul jaho zabrali kiraŭnikom spravaŭ Minskaha abłvykankama.
U 2016 hodzie Ivan Markievič vyłučaŭsia ŭ deputaty Pałaty pradstaŭnikoŭ pa Maładziečanskaj sielskaj akruzie. Supiernikam u jaho byŭ piensijanier z AHP Uładzimir Smalak. Jarmošyna abvieściła ŭpeŭnienuju pieramohu Markieviča.
U svajoj dekłaracyi Markievič tady ukazaŭ kredyt na sumu 150 miljonaŭ rubloŭ (pa kursie 2015 hoda heta składała 8 tysiač dalaraŭ). Kali adniać kredyt, to siaredni dachod Markieviča składaŭ kala 22 miljonaŭ na miesiac, heta kala 1100 dalaraŭ. U jaho vałodańni jość vialikaja kvatera ŭ Minsku (100 kv.m.), a taksama dom u Vałožynie (198 kv.m.). Jašče vyłučeniec mieŭ matacykł «Java».
Jak deputat Ivan Markievič ničym asablivym nie adznačyŭsia. Byŭ namieśnikam staršyni kamisii pa zakanadaŭstvie. «Chto choča znajści rabotu, toj abaviazkova jaje znojdzie», — kazaŭ jon.
Paśla novaha pryznačeńnia Markievič pierastanie atrymlivać zarobak deputata, ale davybary pravodzicca nie buduć. Vyhladaje, što pasada namieśnika staršyni Minskaha abłvykankama — na hety momant najvyšejšy punkt u karjery čynoŭnika.
Novy namieśnik Anfimava
Fota sb.by.
Vasil Hierasimaŭ staŭ namieśnikam staršyni Kamiteta dziaržaŭnaha kantrolu. Hierasimavu 42 hady, a rodam jon ź Minska. Raniej jon pracavaŭ pamočnikam prezidenta pa Bresckaj vobłaści.
Hierasimaŭ skončyŭ jurydyčny fakultet BDU, a pa jaho skančeńni trapiŭ na pracu ŭ Vyšejšy haspadarčy sud (užo likvidavany). Ad 2003 dziesiać hadoŭ zajmaŭ pasadu načalnika hałoŭnaha ekśpiertna-pravavoha ŭpraŭleńnia KDK. Adtul jaho pryznačyli kiraŭnikom KDK Hrodzienskaj vobłaści.
U Breście Hierasimaŭ sustrakaŭsia z praciŭnikami budaŭnictva ŭ horadzie akumulatarnaha zavoda, abiacaŭ pieradać tyja źviestki ŭ Administracyju prezidenta. Padčas letašnich pratestaŭ suprać «Dekreta ab darmajedach» Hierasimaŭ vykazvaŭsia nastupnym čynam: «Nie treba ŭsprymać zbor na finansavańnie dziaržaŭnych vydatkaŭ jak pakarańnie. Heta abaviazak hramadzianina — płacić padatki. Sprava nie ŭ tym, kab spahnać. Heta zroblena dla taho, kab padšturchnuć hramadzian pracavać».
Papracavaŭ u pasolstvie Rasii ŭ Hiermanii
Fota inc.by.
Maryna Daŭhapołava bolš nie budzie pasłom Biełarusi ŭ Łatvii. Jaje na hetaj pasadzie źmienić Vasil Markovič.
Udakładnieńnie: u pieršaj viersii artykuła śćviardžałasia, što na hety momant nivodnaje biełaruskaje pasolstva ŭ śviecie nie ŭznačalvajuć žančyny. Na samaj spravie pasłom Biełarusi ŭ Aŭstryi źjaŭlajecca Alena Kupčyna.
Novamu pasłu ŭ Łatvii Vasilu Markoviču 62 hady, jon rodam z Kažan-Haradka Bresckaj vobłaści. «Žančyny prali, viazali, a mužyki dastavali tytuń, składali ŭ «papušy» i drobna rezali. Ź vialikaj piečki, jakaja vuhłom vychodziła ŭ pakoj, my, dziatva, zachoplena nazirali za tym, jak darosłyja rabili samakrutki, zaciahvalisia i abaviazkova kazali niešta typu: «Och i mocny ciuciun u ciabie, Lavonćjevič, choć badyllo dadavaŭ», — raskazvaŭ dypłamat.
Vučyŭsia na jurfaku BDU, paśla ŭładkavaŭsia ŭ Handlova-pramysłovuju pałatu BSSR. Pačynaŭ pracavać na dypłamatyčnaj nivie jašče za SSSR, byŭ trecim sakratarom pasolstva SSSR (a paśla i Rasii) u Hiermanii. Sprava ŭ tym, što tady jašče nie isnavała pasolstva Biełarusi ŭ Hiermanii. Kali takoje źjaviłasia, to i tam Markovič zajmaŭ pasadu treciaha sakratara.
Tahačasny pasoł Biełarusi ŭ Hiermanii, siabra BNF Piatro Sadoŭski zhadvaje: «Hodny čałaviek, samyja najlepšyja maje rekamiendacyi. Heta čałaviek słova. Vydatna viedaje niamieckuju movu. Vielmi ŭściešany takim pryznačeńniem. Biełaruskuju movu jon taksama dobra viedaje, my ž tady ŭsiu dakumientacyju viali pa-biełarusku», — kaža spadar Sadoŭski.
Ad 1998 hoda Markovič byŭ hienieralnym konsułam Biełarusi ŭ Dźvinsku (Daŭhaŭpiłsie). Tak što łatvijski nakirunak jamu viadomy. Pry im u horadzie byŭ adkryty Centr biełaruskaj kultury. «Viedajecie, kali znachodzišsia za miažoju, dyk svaja nacyjanalnaść robicca bližej, ty adčuvaješ heta vastrej, čym tut, u Biełarusi», — kazaŭ tady Markovič.
Apošniaj dypłamatyčnaj pracaj Vasila Markoviča była pasada pasła ŭ Čechii. Admietna, što ŭ hety čas tavarazvarot miž našymi krainami dasiahnuŭ najbolšaha ŭzdymu. Markovič pradstaŭlaŭ Biełaruś na pachavańni byłoha prezidenta Čechii Vacłava Haveła.
Žonka ŭ Markoviča z Padmaskoŭja. Paznajomilisia ŭ łahiery na Azoŭskim mory, dzie byli važatymi. Kaža, što heta było kachańniem ź pieršaha pozirku. Ciapier jany žyvuć u Łahojskim rajonie ŭ vioscy Markoŭščyna, pabudavali tam dom.
Jeŭrazijskaha intehratara adpravili ŭ Chielsinki
Fota euroradio.fm.
Alaksiej Samasujeŭ staŭ novym pasłom Biełarusi ŭ Finlandyi. Da hetaha jon byŭ načalnikam upraŭleńnia jeŭrazijskaj intehracyi pry MZS.
Admietna, što Samasujeŭ niaredka supravadžaŭ Alaksandra Łukašenku ŭ pajezdkach u Rasiju. Naprykład, jon byŭ u Sočy padčas majskaha vizita tudy kiraŭnika dziaržavy. Jeździŭ nazirać za vybarami ŭ Azierbajdžan. A da hetaha pracavaŭ u pasolstvie Biełarusi ŭ Bielhii.
Źvierniem uvahu, što mienavita Samasujeŭ znajomiŭ zamiežnych dypłamataŭ z novymi praviłami ŭjezdu ŭ Biełaruś paśla taho, jak byŭ pryniaty biaźvizavy režym dla hramadzian jeŭrapiejskich krain i ZŠA.
Admietna, što Alaksiej Samasujeŭ žanaty z hałoŭnaj buchhałtarkaj MZS Viktoryjaj Sysojevaj. U sacyjalnych sietkach jon padpisany na pasolstvy Biełarusi ŭ Šviejcaryi i Paŭdniovaj Afrycy, a taksama na anhłamoŭnyja naviny.
Kali byŭ staršynioj rajona, žyŭ u vioscy, a nie ŭ horadzie
Valeryj Rabkaviec 12 hadoŭ uznačalvaŭ Pinski rajvykankam. Za addanuju słužbu jaho pastavili namieśnikam staršyni Bresckaha abłvykankama. Rodam jon ź vialikaj paleskaj vioski Čuchava Pinskaha rajona. Kali Valeryju było piatnaccać hadoŭ, to pamior baćka. Maci adna pastaviła na nohi šaściarych dziaciej.
Skončyŭ Rabkaviec sielskahaspadarčuju akademiju pa śpiecyjalnaści «ekanamist». Pracavaŭ u rodnym kałhasie «Prahres». Da pryznačeńnia ŭ Pinski rajvykankam uznačalvaŭ miascovuju rajsielhaschimiju.
Cikavy fakt, što paśla pryznačeńnia jon nie pierajechaŭ žyć u Pinsk, a kataŭsia na pracu ź miastečka Łahišyn, dzie mieŭ dom. Tam ža miedrehistrataram u balnicy pracavała jahonaja žonka. U pary dźvie dački.
«Nam jość što pakazać, jość čym ździvić pryjezdžych. Rajon maje vydatnyja pierśpiektyvy dla raźvićcia ekałahičnaha, sielskaha, vodnaha i inšych vidaŭ turyzmu. Dla pierasoŭvańnia pa maršrutach možna vybrać luby transpart — łodku, katar, aŭtobus, rovar i navat voz», — kazaŭ Rabkaviec.
Ciapier Valeryj Rabkaviec budzie namieśnikam staršyni Bresckaha abłvykankama.