Zatrymanaja kiraŭnica ŭpraŭleńnia Minzdaroŭja, adkaznaja za zakupki lekaŭ
Hałoŭnaje ŭpraŭleńnie pa baraćbie z arhanizavanaj złačynnaściu i karupcyjaj (HUBAZiK) MUS Biełarusi zatrymała načalnicu ŭpraŭleńnia farmaceŭtyčnaj inśpiekcyi i arhanizacyi lekavaha zabieśpiačeńnia Ministerstva achovy zdaroŭja Ludmiłu Ravuckuju pa padazreńni ŭ atrymańni chabaru.
Pra heta TUT.BY paviedamiła krynica ŭ halinie i paćvierdzili ŭ HUBAZiK.
Zaviedziena kryminalnaja sprava pa artykule 430 Kryminalnaha kodeksu — atrymańnie chabaru.
Nahadajem, što 29 žniŭnia Ludmiła Ravuckaja ŭdzielničała ŭ bryfinhu, dzie tłumačyła situacyju z karejskaj vakcynaj dla niemaŭlat «Eŭpienta». Pa jaje słovach u 2017 hodzie ŭ Biełarusi ŭźnikła krytyčnaja situacyja, źviazanaja z pastaŭkaj niajakasnych sieryj vakcyny rasijskaj vytvorčaści AKDS.
Hetyja sieryi pieryjadyčna brakavalisia i viartalisia pastaŭščyku. Situacyja pahražała nie prosta zryvam Nacyjanalnaha kalendara pryščepak, ale i masavym raspaŭsiudžvańniem niebiaśpiečnych infiekcyj.
Bujnyja zachodnija kampanii, da jakich źviarnułasia Biełaruś, admovili, bo nie mieli dastatkova času, kab vyrabić vakcyny. I tady Ministerstva achovy zdaroŭja pačało vybirać pamiž vakcynami vyrabu Indyi, Kitaja i Paŭdniovaj Karei. U vyniku ŭziali karejskuju, «Eŭpienta» — niezarehistravanuju.
13 žniŭnia ŭ Hancavickim rajonie dvuchmiesiačny chłopčyk pamior paśla pryščepki. 14 žniŭnia dziaŭčynka takoha ž uzrostu trapiła ŭ reanimacyju paśla płanavaj pryščepki. Paźniej stała viadoma, što ŭ traŭni paśla pryščepki «Eŭpienty» pamierła čatyrochmiesiačnaja dziaŭčynka.